الوداد لاعبين ضد هافيا وتيرناهم مكرفص.. الواك تماركا عليهم التعادل فالشوط الأول بالشمتة ولاعبين مكايسين على ريوسهم خوفا من الإصابات

خرج الوداد الرياضي متعادل فالشوط الأول من الماتش ديالو ضد هافيا كوناكري الغيني، اليوم الاحد فغينيا برسم ذهاب دور 32 من عصبة أبطال إفريقيا.
وسالا الوداد الرياضي الشوط الأول أمام هافيا فتيران الجنرال لاسانا كونطي فكوناكري، بالتعادل واحد لواحد، وماركا له هدف التقدم القناص جونيور صامبو فالدقيقة 9، وحاولو بعدها هافيا يماركيو التعادل وهادشي نجحو فيه فاخر دقيقة من الشوط الأول برأسية للاعبهم كامارا، مع العلم أن تدارت دقيقة صمت قبل ما يبدا الماتش على ضحايا زلزال الحوز.
الشوط الأول كانوا فيه الوداد الرياضي لاعبين بشويا عليهم بسبب حالة التيران حيث البولوز مغوفل ومكرفص وفيه وكاين فيه الغيس، وهذا الشي يقدر يتسبب فإصابات بالإضافة للتدخلات الخشنة ديال لاعبين هافيا.