البقالي: كنهدي الميدالية الذهبية فبطولة العالم لسيدنا والمغاربة كاملين وأنا الباطرون ديال 3000 متر موانع

عبر البطل المغربي العالمي والأولمبي سفيان البقالي، على الفرحة ديالو حيث ربح الميدالية الذهبية الثانية فبطولة العالم لألعاب القوى بعدما فاز بسباق 3000 متر موانع فنسخة 2023 المقامة فبودابست الهنكارية، وهدى الميدالية للملك محمد السادس والشعب المغربي.
وقال سفيان البقالي بعدما ربح الميدالية الذهبية: "كنهدي هاد الميدالية لسيدنا بمناسبة عيد ميلادو وكنتمنى له طول العمر، وكنهديها للأب والام ديالي وكنقولهم شكرا حيث جبتو سفيان البقالي اللي هدى للشعب المغربي ثلاث ميداليات غاليين، وحدة أولمبية و 2 فبطولة العالم، وكنشكر المغاربة راني كنشوف كاع الرسائل ديالهم وكيفاش كيشجعوني ومسانديني وكنشكر صحابي اللي كيعاونوني فالتداريب والجامعة الملكية المغربية لالعاب القوى على دعمها ليا".
وكمل البقالي وقال: " كنتمنى نبقى بنفس المستوى هاد الايام دازت صعيبة عليا وكان عليا ضغط كبير والتفكير ديالي كان مشتت ولكن الحمد لله ولكن كنت كنقول انا هو الباطرون ديال 3000 متر موانع، واليوم لعبت السباق بطريقة عقلانية واخا كان لاعب معيا منافس قوي بزاف، وما نكرش انه قوي حيث عشت معه سنوات من 2019، ولكن الارقام حاجة والميداليات حاجة اخرى، واكتسبت الخبرة اللي خلاتني نربح الميدالية الذهبية وسفيان البقالي كيجي للبطولات باش يربح الميداليات الذهبية".