ها جديد الوداد فمعسكر مراكش بعد ماتش آسفي

كيواصل الوداد الرياضي الاستعداد بمدينة مراكش لانطلاق الموسم الرياضي المقبل، فأجواء زوينة وتركيز كبير من اللاعبين والمدرب عادل رمزي.
وخدام الطاقم التقني للوداد بقيادة عادل رمزي مع اللاعبين بدنيا وتكتيكيا، بمعدل جوج حصص تدريبية يوميا فمعسكر مراكش التدريبي، وبعد الماتش الودي البارح ضد فريق أولمبيك آسفي، رجعو لاعبين الحمرا للتداريب اليوم الاربعاء باش يكملو لبريباراسيون ديالهم.
ومن المنتظر يساليو الوداد الرياضي المعسكر التدريبي الويكاند الجاي بشي ماتش ودي ثاني بعدما يكونو دوزو 10 أيام فهاد التجمع الاعدادي، ويرجعو من مراكش لكازا يكملو التحضيرات لانطلاق البطولة الاحترافية اللي غتبدا يوم 25 من هاد غشت، وغيبداها الفريق بمواجهة الفتح فالدورة الأولى.
ودائما مع الوداد الرياضي، فإدارة النادي برئاسة سعيد الناصيري واستشارة المدرب عادل رمزي، مازال فبحث عن تدعيم صفوف الفريق بلاعبين اخرين فهاد الميركاتو، ومن بين الحاجات اللي باغيين يجيبو مهاجم لتعريض صامبو جونيور اللي مشى للسعودية، وكذلك للتجديد مع الظهير الايسر يحيى عطية الله.