الوداد كيواصل التداريب وخا توقفت البطولة وها جديد الفرقة
كود سبور//
كيواصل الوداد الرياضي الاستعدادات ديالو لاستئناف البطولة الإحترافية، واللي توقفت بسبب مشاركة المنتخب الوطني المغربي فكأس العالم المقبلة بقطر.
وكيركز الطاقم التقني ديال الوداد الرياضي فالحصص التدريبية ديال الفريق الأحمر ملي رجعت الفرقة من الراحة اللي كانوا خذاو اللعابا لمدة يومين من ماتش التواركة الأحد الماضي، على الرفع من مستوى اللياقة البدنية باش تبقى لافريشور عند اللعابا ديال الحمرا.
وخاض الوداد الرياضي حصة تدريبية جديدة اليوم السبت فتيران بنجلون، وحضرو فيها كاع اللعابا، باستثناء غياب كل من رضا التكناوتي ويحيى جبران ويحيى عطية الله اللي مشاو للمنتخب باش يشاركو فكأس العالم والحسين بنعيادة اللي إلتحق بالمنتخب الجزائري، وأيمن الحسوني لأسباب شخصية، فالوقت اللي إلتحق هشام بوسفيان بالترتيب من أسابيع ديال الغياب بسبب الاصابة.
ومن المنتظر يحدد الطاقم التقني للوداد الرياضي بقيادة المدرب الحسين عموتة المكان اللي غادي يكون فيه معسكر الفريق، مع العلم أنه غادي يكون فمدينة قريبة لكازا فحال الجديدة أو نواحي الرباط أو مراكش.