مونديال العيالات: اللبؤات خرجو رابحين كولومبيا فالشوط الأول وألمانيا متعادلة مع كوريا وشاعلة على التأهل للثمن

خرج المنتخب الوطني المغربي للسيدات متفوق على كولومبيا فالشوط الأول من الماتش اللي ملعوب بين المنتخبين اليوم الخميس، برسم الجولة الثالثة والأخيرة من دور مجموعات كأس العالم للعيالات 2023، بأستراليا ونيوزيلاندا، وحاط رجل أولى في ثمن نهائي المونديال.
وسالا الشوط الأول بتقدم المنتخب المغربي بواحد لزيرو على كولومبيا، بهدف ماركاتو اللاعبة أنيسة الحماري من كرة مرتدة من حارسة مرمى كولومبيا، اللي حبست ضربة جزاء سددتها الكابيتان المغربية غزلان الشباك، وهي ضربة جزاء جابتها المهاجمة ابتسام الجرايدي بعدما طيحتها مدافعة كولومبيا وسط مربع العمليات.
للإشارة فاللاعبات المغربيات مقدمات ماتش كبير سوا دفاعيا أو هجوميا أمام الكولومبيات، لدرجة أن المنتخب المغربي هو اللي خذا المبادرة وبشجاعة منذ بداية المباراة وخلق فرص، وراه كاين توازن بين الخطوط ديالو هجوميا دفاعيا، لتفادي شي مفاجأة من كولومبيا، اللي مرة مرة كيطلعو يديرو شي هجمة ولكن بدون نجاعة.
وبالنسبة للماتش الاخر عن نفس المجموعة، فكوريا الجنوبية متعادلة أمام منتخب ألمانيا، وكانت الكوريات متقدمات فالنتيجة بهدف ماركاتو اللاعبة تشو سو هيون فالدقيقة 6، وتسناو الألمانيات حتى اللحظات الأخيرة من الشوط الأول باش يماركيو التعادل بهدف ديال الهدافة والكابيتان أليكسندرا بوب.
وإذا ظلت نتيجة الماتش بين المغرب وكولومبيا بتفوق المغرب، ونتيجة ماتش كوريا الجنوبية وألمانيا بالتعادل أو بتفوق كوريا الجنوبية، فالمنتخب المغربي غيتاهل إلى ثمن نهائي كأس العالم مع كولومبيا.