انتصار تاريخي للمغرب فمونديال العيالات.. اللبؤات ربحو كوريا وجابو أول فوز مغربي فكوب ديموند

حقق المنتخب الوطني المغربي النسوي فوز تاريخي، بعدما ربح أول ماتش له فكأس العالم للعيالات، واللي جا على حساب كوريا الجنوبية اليوم الأحد برسم الجولة الثانية من مونديال 2023 بأستراليا ونيوزيلاندا.
وسالا الماتش بين المنتخب الوطني المغربي وكوريا الجنوبية بنتجية واحد لزيرو لمصلحة اللاعبات المغربيات، وهو الهدف اللي ماركاتو ابتسام الجرايدي فالدقيقة 6، بعد تمريرة زوينة ديال حنان أيت الحاج والجرايدي كملت الخدمة وضربت الكرة بالراس وحطاتها فالدوزيام بوطو د مرمى الكوريات، وهذا هو أول هدف للمغرب فمونديال العيالات وأول هدف عربي أيضا، والجريدي هي ولات هي أول لاعبة مغربية وعربية كتماركي فمونديال السيدات.
وبقات النتجية بين المنتخب المغربي ومنتخب جنوب افريقيا واحد لزيرو لمصلحة المغربيات، اللي دارو ماتش كبير من جميع النواحي دفاعيا وهجومي، وكان بإمكانهن إضافة أهداف أخرى من ليكونتر أتاك، حيث الكوريات خرجو يقلبو على التعادل، ولكن الحظ وقلة التركيز خلاهم يضيعو كرات حاسمة لقتل الماتش بحال الفرصة اللي زكلت روزيلة عيان فاللحظات الأخيرة بعد تمريرة زوينة حاسمة من الكابيتان غزلان الشباك، وهذا الشي كان قدر يتسبب فعودة الكوريات فالماتش ويماركيو التعادل.
المنتخب المغربي بهذا الرباح المهم بزاف، قدر ياخذ 3 النقاط غتخليه عندو نفس عدد النقاط د ألمانيا وكولمبيا بالمجموعة 5، مع امتياز للألمانيات والكولمبيات في انتظار الماتش ديالهم بجوج باش تكمل الجولة الثانية فهاد الكروب، أما كوريا الجنوبية عندها 0 بوان حيث خسرت أيضا الماتش الأول مع كولومبيا، وراه المنتخب المغربي غيلعب فالجولة الثالثة مع المنتخب الكولمبي فمواجهة مصيرية للتاها إلى الدور الثاني.