روزيلة: الخسارة مع ألمانيا صفحة وغنطويوها وغنتقاتلو ضد كوريا وكولومبيا

عبرت روزيلة عيان لاعبة المنتخب المغربي للسيدات على خيبة أمالها بعد خسارة ليكيب ناسيونال مع ألمانيا بنتيجة 6 لزيرو، اليوم الاثنين ضمن الجولة الأولى من دور مجموعات كأس العالم 2023.
وتحدثت روزيلة بعد نهاية المباراة بين المنتخب المغربي وألمانيا وقالت: "كنعتقد أن الماتش صعاب ملي تسجل علينا الهدف الأول، وما كانش رد الفعل، وما عطيناش داكشي اللي كنا باغيين نقدموه".
مهاجمة المنتخب المغربي وتوتنهام الإنجليزي، أكدت أن ماتش ألمانيا صفحة وتطوات، ودابا غتبدا هي وصحباتها فالمنتخب المغربي يوجدو للماتش الجوج اللي مازالين: وقالت: سالات هاد المباراة، دابا مازال عندنا 2 ماتشات، وغنتقاتلو فيهم".
وبالرغم من الخسارة الثقيلة اللي تعرض لها أمام المنتخب الألماني فأول مشاركة له فكأس العالم، راه مازال عند المنتخب المغربي حظوظ فالمجموعة 8، ولكن خاصو يدير نتيجة إيجابية أما كوريا الجنوبية وكولومبيا.