المغرب فيق الأفارقة فالمونديال.. غانا جابت رباح مهم ضد كوريا الجنوبية فماتش صعيب

فاق منتخب غانا وحقق رباح مهم اليوم الاثنين على المنتخب الكوري بنتيجة 3 مقابل 2، فماتش زوين ومشوق فالجولة الثانية من كأس العالم قطر 2022، من بعدما كان خسر الماتش الأول مع البرتغال.
المنتخب الغاني زرب على كوريا وخرج رباح فالشوط الأول بنتيجة 2 لزيرو، ماركاهم له محمد ساليسو فالدقيقة 24 ومحمد قودوس فالدقيقة 34، وفالشوط الثاني جابوا الكوريين التعادل وماركا لهم كيو سيونك 2 بيوتا فالدقيقة 58 والدقيقة 61، ولكن رجع محمد قودوس يماركي هدف الرباح لغانا فالدقية 68، وبقاو الغانيين كيدافعو على المرمى ديالهم قدام ضغط الكوريين حتى سالا الماتش وربحو.
وتحصل المنتخب الغاني من بعد هاد النتيجة على أول 3 النقاط، وتعادل مع البرتغال مؤقتا فصدارة لكروب 8، فانتظار ماتش كريستيانو وصحابو ضد سواريز والأوروكواي اللي عندها نقطة فحالها فحال كوريا.
للإشارة فالرباح اللي حقق المنتخب الوطني المغربي على بلجيكا البارح فالمجموعة 6، فيق المنتخبات الإفريقية فحال غانا اللي ربحات كوريا، والكاميرون اللي كانت غادي تخسر مع صربيا وجابت التعادل.