كتعيش بزاف من أندية البطولة الاحترافية بالقسمين ديالها أزمة مالية كبيرة، بسبب أحكام النزاعات اللي عليها عند الجامعة الملكية المغربية لكرة القدم، حيث لاعبين ومدربين تعاقدات معهم فالسابق وما وفاتش بأداء المستحقات ديالهم. وإلى حدود يوم 31 يوليوز، وصل مجموع مبلغ النزاعات اللي على فرق البطولة الاحترافية لحوالي 29 مليار سنتيم، خاصها تخلص لماليها، اللي حكمت غرفة النزاعات بالجامعة الملكية المغربية لكرة القدم لمصلحتهم من لاعبين ومدربين. وكيوصل عدد الأندية الممنوعة من الانتدابات بالقسم الوطني الأول إلى 9 فرق، وهي الرجاء الرياضي، والمغرب الفاسي، وحسنية أكادير، واتحاد طنجة، والمغرب التطواني، ومولودية وجدة، وأولمبيك أسفي، وشباب المحمدية، ويوسفية برشيد. وبالمقابل يالاه كاينين 5 الفرق بالقسم الأول اللى ما عليهاش المنع وهي الجيش الملكي، والوداد الرياضي، والفتح الرياضي، واتحاد التواركة، وشباب السوالم، ونهضة الزمامرة. أما أندية القسم الوطني الثاني فإلى حدود التاريخ المذكور، 11 فريق عليه عقوبة المنع بسبب أحكام النزاعات، وخاصو يخلص باش يدير الانتدابات، و 5 فرق اللي بإمكانها تدير التعاقدات مع لاعبين جداد. وكيبلغ مجموع الأندية الممنوعة من الانتدابات بالقسم الأول والثاني 20 فريق، وطايحة فموقف صعيب دابا، حيث أغلبها بدا كيدير تعاقدات وانتدابات جديدة خلال هذا الميركاتو الصيفي، قبل ما يحل مشكل المنع من التعاقدات، الشي اللي كيخليها مهددة بالحرمان من تسجيل الانتدابات الجديدة إدا ما خلصتش الأحكام اللي عليها. وكانت العصبة الوطنية لكرة القدم الاحترافية تبرات قبل أيام من هذا الشي، وخبرت كافة المتعاقدين أنها لا تتحمل أي تبعات ابرام العقود مع الاندية، اللي لم يتم رفع المنع عنها من طرف الهيئات المختصة علما أنها لن تسلم أية رخص، بمعنى أن الفرق اللي ما خلصت الاحكام اللي عليها فالنزاعات راه اللاعبين الجداد اللي سنات معهم خلال هذا الميركاتو ما فتقدرش تكاليفيهم.
