الراضي مجاش اليوم باش يتحاكم هو وخوه كريم وحط شهادة طبية وبغا يدير بحال مبديع.. ها شنو قررت غرفة الجنح فابتدائية سيدي سليمان

معروف على أن عدد من السياسيين اللي كيكونوا متابعين أو غادي تسمع ليهم الضابطة القضائية في إطار أبحاث تمهيدية كيبقاو يتهربو باش يلعبو على الوقت. كيف كان كيدير الوزير السابق محمد مبديع والبرلماني رشيد الفايق ووو... هادوا كانوا ديما كيهربوا من المساءلة القانونية لكن النيابة العامة تتعامل بصرامة معاهوم.
كولشي كان عارف كيفاش تشد الوزير السابق مبديع والبرلماني رشيد الفايق. كانت تعليمات واضحة من النيابة العامة باش يتشدو ويتم الاستماع إليهم على خلفية الأبحاث اللي كانت مفتوحة معاهوم، وخا كانوا كيهربو وتقديم شواهد طبيعة مشكوك فيها.
اليوم الثلاثاء كيف قالت "كود" من قبل كان من المنتظر باش يدوز النائب البرلماني السابق إدريس الراضي، إلى سبعة نواب لأراضي الجموع، وشيخ قروي، أمام غرفة الجنح العادية بالمحكمة الابتدائية بمدينة سيدي سليمان.
حسب مصادر "كود"، فإن إدريس الراضي مجاش اليوم للمحكمة، والدفاع ديالو أدلى بشهادة طبية، كما غاب شقيقه كريم الراضي بدوره عن جلسة اليوم.
مصادر "كود" قالت باللي المحكمة قررت تأخير الملف إلى جلسة 19 شتنبر المقبل لإحضار المتهم إدريس الراضي، مع الإشارة أن باقي المتهمين حضروا جلسة اليوم
وحققت عناصر الفرقة الوطنية للشرطة القضائية مع الراضي وباقي المتورطين اللي معاه فقضية كتتعلق بالتزوير للسطو على أزيد من 83 هكتار ضواحي جماعة القصيبية، من بينهم كريم الراضي وهو هو البرلماني السابق الراضي، بالإضافة إلى شيخ قروي.
وكيل الملك فسيدي سليمان كان استنطق المتهمين، دار ليهم جلسة باش يبداو يتحاكمو غدا الثلاثاء في ملف جنحي يحمل رقم "354/2101/2023".
ووجهات النيابة العامة للمتهمين "ب.ا"، "ا.ع"، "ا.ع"، "ح.م"، "ا.م"، "ا.ح"، "م.ص"، "ا.ق"، إلى جانب الراضي وخوه كريم تهم "صنع عن علم إقرارات"تصاريح" تتضمن وقائع غير صحيحة واستعمالها والتوصل بغير حق الى تسلم شواهد إدارية عن طريق الإدلاء ببيانات كاذبة وانتحال صفة كاذبة واستعمالها واستعمال وثيقة إدارية بمنح ترخيص مزورة مع العلم بذلك، والمشاركة في ذلك".