جمهور الأهلي تجمعو قدام لوطيل ديال فريقهم فكازا وكيشجعو اللاعبين ديالهم قبل الفينال القاصح مع الوداد (تصاور)

تجمعو شي مشجعين ديال الأهلي المصري غير دابا شوية قدام لوطيل ديال فريقهم وسط كازا، قبل ساعات من الفينال اللي غيلعبو مع الوداد الرياضي فستاد دونور.
العشرات من مشجعي الأهلي المصري وقفوا قدام فندق الأهلي المصري حدا التوين وسط كازا، واخدين راحتهم وكيشجعو فالفريق ديالهم وكيموتيفيو اللاعبين باش يكونوا فنهارهم فالفينال ضد الوداد، وعارفين بلي المهمة ما غتكونش ساهلة واخا عندهم امتياز ماتش الذهاب بمصر بالقاهرة ولكن الواك صبح عقدة بالنسبة الأهلي فالفينال ديال عصبة أبطال إفريقيا.
وكان ماتش ذهاب عصبة أبطال إفريقيا بالقاهرة سالا بنتجية 2 لواحد لمصلحة الأهلي المصري، والوداد الرياضي معول اليوم فماتش الروتو يربح على الأقل بنتجية واحد لزيرو ويتوج باللقب للمرة الرابعة فالتاريخ ديالو، خصوصا وأنه غيكون مدعوم بالجماهير الودادية الكثيرة ولاعب فستاد دونور.