ضوسي "تسمسير في القضاء".. تفاصيل حصرية على شكون لي معتقل وشكون لي متابع في حالة سراح وها المحجوزات

فضوسي السمسرة القضائية لي متبعين الخيوط ديالو، "گود" جابت تفاصيل دقيقة كتخص الأشخاص لي متابعين في حالة اعتقال ولي في حالة سراح، وكذلك المحجوزات.
كشفات مصادر "گود" أن الأشخاص لي متابعين فحالة اعتقال هما بطلا القصة "ربكو" لي مزيود في 1961 فالدار البيضاء، والمهنة ديالو منتدب قضائي إقليمي عام معندوش سوابق قضائية، ولي معتقلين معه (ع.ن) بياع وشراي، وزيد عليهم (ش.ح) و(ش.ع) ومول الشركة (ع.م) وبياع وشراي آخر لي هو (ه.د)، وامرأة سميتها فاطمة وملقبينها بفاتحة و(ه.ه) و(ن.ب) و(ح.ط) و(ر.ر) و(م.ب) حتى هو بياع وشراي وزيد عليهم (ح.ي) مساعد موثق و(كريمة.ر) ربة بيت.
وبخصوص هادوك لي مابعين في حالة سراح كاينة خديجة ع وهي مساعدة ديال محامي، وخودج الخضارة وعبد الله مسير شركة ولكبير بياع وشراي وسعيد ما خدام ما ردام زايد في 1964، وحميد رصاص وابراهيم مول القهوة والمصطفى گرسون في القهوة ونادية فامدوميناج في القهوة وزيد عليهم عدنان المهندس، وأخيرا واحد المنتدبة قضائية.
وأما عن المحجوزات المقدمة للنيابة العامة أكدات مصادر "گود" أنه كاين 21 محضر لالتقاط المكالمات زائد محضر الأبحاث والتحريات و24 محضر ضبط واستقدام وتفتيش وحجز، وزيد عليها 42 محضر استماع و14 إشعار ديال الحراسة النظرية، و8 محاضر مواجهة ومحضرين واحد ديال النقل للمستعجلات ولاخور ديال الاتصال بالعائلات، وأخيرا 18 قرص مدمج.