ماشي بصاح حكيمي كاتب ثروتو لامو. القضاء سوا فالصبليون او فرانسا هو اللي كيحدد كلشي وثروتو تقدر ب70 مليون اورو وثروة هبة 3 مليون اورو

كشفت قناة فرنسية "سي 8" ان ما قيل٬ عن تسجيل كافة املاك نجم المنتخب المغربي لاعب باري سان جيرمان اشرف حكيمي لوالدتو باش ما تاخد هبة عبوك مراتو والو٬ ماشي صحيح. فبرنامج لسيليل حانونا قال كرونيكور باللي هاد الشي جا من ميديا من الكوت ديفوار كيختالق لخبار وباللي هاد لخبار ما عندها لا ساس لا راس.
Loading Ad
00:00
/
00:00
واضاف ان هاد الميديا معروفة كتركب على حدث وتخربقو ويرجعوه كريديبل. واكد باللي هادا "فايك نيوز"
فهاد البرنامج قال لكرونيكور باللي ثروة حكيمي واصلة ل70 مليون اورو ولكن وضح هبة٬ ام والدو٬ ثروتها واصلة ل3 مليون اورو
واكد باللي حكيمي ماما يمكنش يكتب ثروتو باسم امو لا ففرانسا ولا فالصبليون.
والدة حكيمي كانت قالت ل"كود" فتصريح حصري قبل ايام باللي "انا والله ما عارفة شي حاجة من هادشي اصلا" يعني هي ما فراسها والو. باش ما يكونش فراسها يعني ما كاتب ليها والو. حقاش فاوروبا كاين ضرائب كتخلص كل عام بعد ديكلاراصيون كيديرها مول لفلوس. طبعا مادام ما عارفة والو راه ما كاتب ليها والو
حكيمي عندو مع مراتو جوج وليدات مع الممثلة والراقصة هبة عبوك. فالصبليون٬ الطلاق كيكون عبر جلسات فالمحكمة٬ واخا طلبو لمرا ويكون اتفاقي بين محاميي الطرفين قبل الجلسات٬ ضروري يخلص الاب النفقة. فحالة حكيمي القاضي ماشي غادي غير يطلب النفقة فيها الاقامة ولقراية ديال الدراري٬ حتى العطل اللي كانو كيديروها مع باهم فبلايص واعرين٬ مفروض على حكيمي يخلصها عليهم على الاقل 3 سنين بعد الطلاق. باش ما يحسوش الاطفال بالتغيير.