تحية بوغطاطية للجميع، كاين واحد المثلة كتقول: لي فيه شي طبيعة عمرو يبيعها. وفرواية خرى: لي فيه شي ما هناه. وعلي المرابط مع الأسف بااااقي مابغا يحيد منو ديك الطبيعة القبيحة ديال التضليل والتدليس والكذوب حتى هو. غير وكان فالآونة الأخيرة، المرابط بدا كيفاجئ المتتبعين ديالو بشي صفات جداد. بحال الغباء وشوية ديال، يا إما الجهل أو هبل تربح. كل مرة وباش كيبهرهم. فالحقيقة هاد الصفات ماشي جداااد جداد، حيت المؤشرات ديالهم كانت كتبان شحال هادي، ولكن فالآونة الأخيرة بداو يبانو بشكل أوضح بكثييير، لواحد الدرجة كتخليني وتخلي أي واحد يتعاطف مع الحالة لي وصل ليها المرابط اليوم، خصوصا من مور ما توجه لليوتيوب وصبح بحالو بحال أشباه المناضلين والمعارضين ديال "اليوتيوب"... السيد ولا "براح 2.0" ماشي حتى حلايقي ديال "يوتيوب". ما غاديش نطول عليكم، هادا مقال بوغطاطي سريع تفاعلا مع الفيديو الأخير ديال علي المرابط عن "الجاسوس المغربي المزعوم في ألمانيا" لي قالك حكا والواد كان كيتجسس لصالح المخابرات المغربية على الناس ديال ما يسمى ب "حراك الريف". وصراحة كنشكر وغادي نبقا ديما نشكر علي المرابط على هاد الفرص الزوينة لي كيعطيني وكيعطي لغيري باش نفرشوه ونزيدو نفضحوه أنه خوايضي ومدلس ومضلل وكذاب... وزيد عليها هاد المرة غبي وبليد. وباش نكون معاكم عملي، كاينين 3 ديال النقط أساسية فداك الخوبير ديال المرابط على الجاسوس المزعوم: أولا، الغباء: الغباء ديال علي المرابط، كيتجلى فاش كيقول بلي حكا المخابرات الألمانية شدات واحد الجاسوس مزعوم كان خدام لصالح المخابرات المغربية، ولكن حكا ما عرفناش واش بصح كان خدام مع المغرب ولا لا، وتسائل علاش السلطات المغربية ما قالت والو على الموضوع؟ علاش ما أكداتش، ما نفاتش؟ ولكن كيجي تاني كيقول بلي من المفروض كون كان داك الجاسوس المزعوم بصح خدام مع المخابرات المغربية، ماكانتش المخابرات الألمانية تشدو، وبلي كانت غادي تسلمو للمغرب، بحكم حكا قالك بلي القاعدة المتعارف عليها بين المخابرات أنه فاش كيشدو شي جاسوس ديال شي بلاد، ما كيعتقلوهش ويحاكموه وإنما كيسلموه لديك البلاد، مقابل أن ديك البلاد نهار تحصل شي جاسوس ديال البلد الآخر حتى هي ما تاحكموش. وا دابا عطينا اللوجيك أ با عليلو !!! واش هاداك محمد أجعوض، واش جاسوس ديال المخابرات المغربية ولا ماشي جاسوس وداكشي كذوب؟ دابا المرابط براسو كيقول بلي كون كان جاسوس مكانوش غادي يعتقلوه، ولكن فنفس الوقت كيقول ويأكد بلي أجعوض جاسوس ديال المخابرات المغربية وبلي التهمة ثاااابتة عليه مافيهاش تخرشيش. فهم تسطى مع المرابط... شفتو الحالة لي وصل ليها اليوم؟ ولكن أجي؟ شنو الدليل لي اعتمد عليه علي المرابط باش يقول بلي أجعوض راه بصح جاسوس ديال المخابرات المغربية؟؟ قالك أسيدي، راه هووووو برااااسو لي اعترف بفمو للبوليس والقضاء فالمحكمة بلي كان كيتجسس لصالح المخابرات المغربية على الناس ديال ما يسمى "حراك الريف" في ألمانيا، وبلي هادشي مقيد ومسجل فالمحاضر. واخا أ با عليلو... بغض النظر على أن هادشي فيه بزاف ديال المغالطات، حيت أجعوض، حسب شنو قالت الصحافة الألمانية، ما قالش بلي تم التجنيد ديالو فالقنصلية وداك الهضرة كاملة، وإنما أجعوض براسو أكد بلي تفاجئ بالاعتقال ديالو وبلي مادار حتى شي حاجة خايبة فألمانيا تضرهم، وبلي فاش مشا للقنصلية، كان مشا ليها باش ياخذ وثيقة حسن السيرة والسلوك. بغض النظر على هادشي... أنا غنمشي مع المرابط فهبالو وخرايفو ونفترضو بلي أجعوض بصح "جاسوس"... إذن علااااش عليلو كيحرّف ويقطّع ويخبي ويدلس وكياخذ غير داكشي لي بغا باش يدوز المغالطات ديالو وديال الجهات لي مخدمينو "براح" ديالهم، وداكشي لي ماشي فمصلاحتو وماشي فمصلحة دوك الجهات كيدير عليه عين ميكا؟؟ علاش؟؟ علاش المرابط ما قالش الاعتراف الكامل ديال أجعوض كيفما نقلاتو الصحافة الألمانية؟؟ باش اعترف الضبط أجعوض فالمحكمة ولي داك الاعتراف ديالو مقيد فالمحاضر كيف كيقول عليلو هو براسو ؟؟ وهاااادا هو ما يسمى بالتخوفيش... يعني التدليس والتضليل. ثانيا، التدليس والتضليل: علي المرابط بالتدليس والتضليل لي معروف بيهم، ولي خلاوه يكون لامين ديال الخوايضية تحت غطاء "الصحافة"، السيد تعمد فالفيديو يحرّف من الاعتراف ديال أجعوض فالمحكمة ومايقولش كولشي. (هادشي طبعا إذا افترضنا بصح بلي أجعوض خدم كجاسوس للمخابرات المغربية). أجعوض، حسب ما نقلاتو الصحافة الألمانية اعترف فالمحكمة الإقليمية العليا في دوسلدورف، بأنه "نقل معلومات عن الجزء الجزائري من حركة الاحتجاج وأنصارها". نقل معلومات عن ماذا الله يخليك؟؟ عاودها عاودها !! قالك نقل معلومات عن الجزء الجزائري من حركة الاحتجاج (يعني ما يسمى ب "حراك الريف") وأنصارها. هااااا !! علاش علي المرابط ماقالش هادشي فالفيديو ديالو؟؟ ياك هذا هو الاعتراف ديال أجعوض فالمحكمة؟؟ علاش المرابط ما هضرش عليه؟ واش المرابط جاتو النفس على النظام الجزائري والمخابرات ديالهم، حيت ما بغاش يبينهم بلي كانو مخترقين ما يسمى ب "حراك الريف" فأوروبا؟؟ واش جاتو النفس على نظام العسكر ما بغاش يبينو بلي كيدعم مخططات التقسيم والانفصال فالمغرب؟؟ ولا جاتو النفس على دوك الناس ديال ما يسمى ب "حراك الريف" حيت غادي يفضحهم بلي الأمر مااااشي متعلق بمستشفى وجامعة بحال لي كيدعيو وبلي كان غادي يثبت بلي داكشي لي كان كيقولو الإعلام المغربي على التحركات المشبوهة ديال المحسوبين على الحراك المزعوم، بلي صحيح؟ ولا شنو بالضبط؟ شنو السبب لي خلى علي المرابط أنه يتعمد يتجاهل هاد الجزء من الاعتراف ديال أجعوض لي أصلا كيقدمو كدليل بلي كان خدام لصالح المخابرات المغربية؟ وماشي هادشي فقط، وإنما فاش غادي نبقششو كثر فالموضوع غادي نلقاو معطيات تدل على أن أصلا المتزعمين ديال ما يسمى ب "حراك الريف" في أوروبا، ولي تقدمو كشهود فقضية محمد أجعوض، هما أصلا معروفين بولائهم للنظام الجزائري. ايييييه كيف كتقراوها !! كاين منهم جوج ديال الأشخاص، واحد فيهم هضر عليه المرابط فالفيديو، ولي سميتو عزيز أكراولي Aziz Agrawli. ولكن كاين واحد آخر ما هضرش عليه المرابط حتى هو شاهد فقضية أجعوض، ولي معروف بالإسم ديال "يوبا الغديوي". هاد الجوج، (يعني أكراولي والغديوي)، معروفين للعادي والبادي بلي موالين للنظام الجزائري وبالعلالي كاع. وكاين أكثر من منشور ديالهم فحساباتهم فمواقع التواصل الاجتماعي، كيعلنو فيه بشكل صريح ووقح كاع ولائهم للنظام الجزائري، وانا ختاريت ليكم واحد العينة قليلة فالصور أسفله، واللائحة طويييلة: هادشي طبعا بلا ما نهضرو على كيفاش الإعلام الجزائري الرسمي والإعلام التابع للنظام والمخابرات، كيتفانا فتغطية كاع الأنشطة والوقفات والتجمعات لي كيديروها نشطاء ما يسمى ب "حراك الريف" فأوروبا. ديما حاضر ناضر معاهم وكيهضر عليهم ماشي كحركة احتجاجية بغات مستشفى وجامعة، وإنما كتهضر عليهم كحركة "تحررية" انفصالية بغات دير ما يسمى ب "الجمهورية الريفية" المزعومة. فهاد الحالة، واش مكانش خاص المرابط يتسائل، كيفاش ولات ألمانيا مترّعة للعملاء لي خدامين لصالح المخابرات الجزائرية تحت غطاء "حراك الريف"؟؟ وشنو علاقة إعلان الولاء للنظام الجزائري بالمطالب المزعومة ديال ما يسمى ب "حراك الريف"؟؟ ولكن على ما يبدو ما يمكنش أصلا لواحد عميل ديال الكابرانات غادي ينوض يفتن على الزملاء ديالو فالحرفة. ما علينا. نجيو دابا للنقطة الثالثة ولي هي شوية ديال الجهل ديال المرابط مخلط مع الكلاخ. ثالثا، الجهل: واخا علي المرابط بين براسو بلي غير كيخربق، وثبت بفمو بلي محمد أجعوض موحالش واش جاسوس ديال المخابرات المغربية حيت قالك حكا كون كان أجعوض جاسوس، كون راه سلموه المخابرات الألمانية للمغرب، حيت حسب ما قال هو، قالك هادي قاعدة معروفة فالتعامل بين الأجهزة فعالم المخابرات. هنا المرابط بين على واحد النوع ديال الجهل، حيت هاد المسألة لي كيهضر عليها ديال الاتفاقات بين أجهزة المخابرات بتبادل تسليم الجواسيس كتكون فحالة ما إذا تشد جاسوس كيضر بالأمن والاستقرار ديال بلد معين لصالح البلد لي خدام معاها. يعني يكون مثلا كيتجسس على الجيش ولا على الأمن والمخابرات ديالها أو على سياسيين...الخ. والحالة ديال محمد أجعوض حسب ما قالوا المرابط وقالتو الصحافة الألمانية، مكانش خدام لصالح المخابرات المغرب باش يتجسس على ألمانيا ومصالحها داخل ترابها. وبالتالي علاش الخارجية المغربية أو السلطات عموما تخرج تأكد أو تنفي هاد الخبر؟ بل كثر من هادشي، أصلا فاش شي دولة كتعلن بلي شدات شي جاسوس كيضر بالمصالح ديالها، الدولة لي كتكون متهمة أن داك الجاسوس خدام لصالحها، أول حاجة كتديرها هي أنها كتخرج تنفي أي علاقة بها بالموضوع. وفالحالة ديال أجعوض هاشي ما كاينش، والقضية كلها فيها بزاااف ديال التخوفيش. ولكن مع ذلك عجباتني الحجة (l'argument) لي خدمها المرابط باش زعما يقول بلي السكوت ديال السلطات المغربية وعدم تفاعلها هو نوع من الدليل على أن أجعوض خدام لصالح المخابرات المغربية... اممممم... يعني بالمنطق ديال المرابط، عمر الراضي بصح كان جاسوس ديال المصالح الهولندية، مادام ما هولندا والخارجية ديالها كانو ضاربين الطم وما نشرو حتى شي بيان رسمي للعموم ينفيو فيه الاتهامات المغربية.... هاااا !! إيوا شفتيييي يا با عليلو... كثرة التنقاز من المقلة أش كيدير... ها نتا بلا ما تحس، ضربتي ف "الزميل" ديالك وثبتي بالمنطق ديالك والتحليل "المهني" ديالك المجهد بزااااف بلي عمر الراضي كان شكام ديال هولندا... عميل تحت غطاء الصحافة... سبحاااان الله بحااالك ! يالاه تهلا أخا المرابط.... ونصيحة بوغطاطية، تبقا تشرب الدوا قبل ما دير شي فيديو أو تدوينة !
