صفحات من الزجل العتابي(نعيش حياتي)

- صفحات من الزجل العتابي....
(نعيش حياتي )
بغيت نغني وندندن
ننشد للدنيا موال..
نعيش حياتي ونتبنن
بالسعادة وراحة البال..
الفرحة تعوض لي لحزن
نحقق ف ايامي امل..
ننسى الهم لي ساكن
ف قلبي وزاد لي لهوال..
نتمتع بالحب نسكن
نعمر دروب الجمال..
نزين حياتي بالفن
بالوان الصفا والكمال..
نفتح قلبي ونحن
عل الوقت لي غاب توضر وجال..
نرافك عشقي لمدوخ
ونداوي جراح السؤال..
نخلي هبالي يفرخ
يركب امواجو يغوص بين لحوال..
نتحزم بالسر وعليه نعسس
نلبس قفطانو وبجلايلو نعرس..
نكمط هظوري ونشطب رحبة الهم
نسكم الخطوة ونتفكد لكدم..
نفرش ظلي ونتغطا بالخيال
نصبر ونكابر ولو نتالم..
نجري ونطلع عكبة ليام
نكفض كمايمي نزير لحزام..
نفيق صوابي اكون باحوالي عالم.
نشري لوقر ونتسلف لمحنة
نتريس حماقي ونحلم نتهنا..
نمد يدي للخير ونسلم
نسرح سوالفي يمشطهم زماني
نكرط وجهي خيالي دواني..
قال لي شيطانك ابليس مكلظم
قال لي نارك طفات
ولي شعلها يسقط ف الافات..
اجي ف الحفرة يطيح عاود ثاني
قال لي شلا مسايل
شدني من عنقي وبدا يتفايل..
عاود لي خبيرة سوايعي الفايتة
مس لي راسي وشاف فيا شوفات .....
- الزجال عبد الرحيم يونس..
0672513154
akraoun@hotmail.fr