صفحات من الزجل العتابي: رحبة المناحس.

كلشي مداحس
عل الطمع
ف رحبة المناحس
كلشي مقرع
كلشي مكفس
كلشي واكل ,مخ الضبع
كحل الراس
غادي مهوس
حاسب راسو مبرع
عقلو مصدي
وبالو مسوس
اما خاطرو
مابقى فيه مايتجمع..
مابقت نية
كلشي تفلس
مابقى لمان
تحفرت جدورو وتقلع
مابقى خير
فين تغمس
ما بقت حيلة
ف هاد الزمان
تنفع
فين لهنا لي كان
فين خيالو
لي داير الحس
تهرست شقوفو
وتزلع
ممنوع تقيس
ممنوع تمس
قدام الهم
والجوع لي تيقمع..
يا واقف
اش داك تكلس
كون على بال
اتصنت ليا واسمع
هذا زمان اخر
زمان عامر نحس
زمان الحيرة
ما بقى فيه ما يتجمع
طاح قنديلو
وتهرس
طفاتو ليام
وتفركع
بين
عيشةالمحنة
والشوك يقرس
النفس مجروحة
والقلب تقطع...
طار فرخ الصحبة
رفرف بجناحو
طار علا ف سماه
ما عرف منين
جاتو ضربة
كسرت ليه جناحو
عمات ليه الشوف
سكنات فيه
الخوف
خلاتو يتفتف
وحلفات
ماتطلق سراحو
رماتو بين نياب
الغلبة
تما شداتو
وما طلت عليه
حتى فجر صباحو
عادا لقاوه
ف ديك الرحبة
رحبة المناحس
حتا حد ما سمع صياحو
كان ناوي يتخبا
خايف
من فراشو
خايف
من دخول العتبة
خايف
لا يسمع حد نواحو
خايف
من البخور
وسبوب الطلبة
خايف
لا يديو ليه سلاحو..
عيط
يا التالف بين اوراقو
يالي عيا
من الكتبة
وداق عليه مراحو
عيط
يا الحاظر للنكبة
يالي عاش
سنين من القهرة
وشاف الفرسان
حتا طاحو
عيط
غير عيط اوكان
مابقت بلاصة
فين تتخبا
حتا من القلوب قساحو
عيط وقول
فين الحباب
فين المحبة
وفين الخوت
لي راحو
عيط
وقول يا حسرة
فتش ف الرحبة
وتمهل
فتش
وجبد للسقيم
راحتو وافراحو ................
''الزجال ...عبد الرحيم يونس ..
0672513154
akraoun@hotmail.fr