امواج الكلمة: لهنى وراحة البال.

قال لي, مال قلبي سكناتو لهوال , مالي, حتا انا نكلس نشد الصفا نمسو بيديا ,ونسكن فدربو نتمتع بيه ,ندير جناح ونطير معاه ,وفين ما مشا نكون حداه ,حيث الصفا هو ليا وانا مولاه ,حتا راحة البال ,بغيت نسكن حداها تدفي قلبي وتشفيه من لسقام ,تبان النجمة ,نجمة لمحبة ,تزرع نورها ف الضلام ,نشوفو طرقان وندقو بيبان لوفا ,ف كل باب وف كل عتبة نغرسو الامل ,نبنيو حيوطو نرمموه الى كان باغي اطيح ,نوقفوه بالعزيمة ,نسقيوه بشوفة السر ,نقولو ليه غير وقف لا تبكي ولا تتاسف راه الامل بجنبك ,ضوي بيه وشوف جنابك ,عيط عل لوقات تسعدك بدقايق لمحنة ,تفرح وتتهنى ,تسعد فايامك بلا ما تتسنى ,تكلم وقول غير انطق, قول وزيد قول ,ركز مزيان وحقق ,راه الدنيا بغاتك تبقى ,لا تروح تتماطا لديك الدعقة ,راه تجي فيك شي طلقة او لا تبليك بنت الحمقة ,تصيبك مجلي ,وانت ما تعرف شاي ,هموم الدنيا ونحس الكية ,ما يعرفو غير لي عارف وجرب الخطية,ياك بغيتي غير لهنى ,غادي تلقاه ترافقو ويرافقك ,والى سامحتي فيه هو عاطيك عاهد ما ينساك ما يفرط فيك ,سلم عليه وبوس ليه ايديه الى كنتي باغي تديه ,خصك تعرف تهتف بالصدق لي كان بكري بالدهب مشري ,ماشي ديال دابا, وبحال دابا, كلشي زعفان ,كلشي غضبان الله اكون ف العوان ,بلانا هاد الزمان ,كلشي عيان فين العز لي كان وفين الشان ,عليك امان عليك امان ,لا قدور ولا حسن,اوا هدا ماكان ,وفنفس الشهر ف هاد المكان 'وقفنا جميع جنب السور ,شادين النوبة ,وخا الحالة مغلوبة والوقت راها مزروبة ,غوت واحد فينا وقال ,يا عباد الله هادي والثوبة ,اش هاد الحالة واش شفتو اشنو طرا ,والله الى ضحكو عليناولعبو علينا العشرة ,ودقو مسمار د العشرة ف العنكرة ,ولينا, فين ما شفنا الصداع نعطيوه بالتيساع ,علاش,حيث بغاونا كلنا نقولو باع باع ,اوا خلي الطماع ياكل حق الجياع ,خليه خليه, اشوف سوء الاوضاع خليه يضحك عل الضباع ,حتا توصل ليه السباع,,,تدوقو وتوريه, مرارة الضياع ,,
توقيع الزجال العتابي ,عبد الرحيم يونس,,,,