عامل الناظور السي بتهامي دارو ليه السماوي فالخيرية ديال الناظور

صورة عن ناظور سيتيالعاقل بنتهامي العامل الجديد ديال الناظور لبس الجلابة نهار الجمعة ومشى لجامع يصلي مع أعيان ومنتخبي المدينة ولي كيصليو فالمناسبات ،من بعد الصلاة ضرب دويرة للخيرية يشوف حال اليتامى ويعرف الوضعية ديالهم.هادي زوينة أسي بنتهامي . دخل السي العامل ولقى فالإستقبال ديالو عرام ديال عباد الله منهم مدير الخيرية والمندوب ديال التعاون الوطني والمكتب المسير للجمعية الخيرية ،داوه فين بغاو وشاف ليبغاو، وخرج على نيتو السي بنتهامي واخا حنا عارفين الى الداخلية مكتوضفش لفيهم النية،الحاصول الشريف ولد الريف داروليه خاوية فعامرة وسيفطوه منشط ماشاف ماتشوف،هدا سميتو السماوي الله يداوي.
أسبوع من بعد وبالضبط نهار اثنين 29 مارس شي دراري ديال الخيرية ساخطين على الوضعية صورو البراتش فين كينعسو و الطواليطات والدوشات، واحد الفضيحة ماتبغيهاش لعدوك،ونشروهم فالموقع ديال "ناظور24"،كالو الدراري لي كاعيين "لا كتوبا باش نقراو لا ضروف كتساعد،جوج روبينيات كنتناوبو عليهم،الوسايد أعباد الله والو،كيدوقونا صافي من الماكلة ،خاصنا هاديك المنظمة دبال غوث اللاجئين ،وكيخدمونا من الفوق". ما كاملاش 24 ساعة المدير ديال الخيرية ضربها بجرية للموقف وجاب الصباغة باش يصبغوالشراجم والبيبان و الناموسيات، ويغبرو الصدا ليكاين فالروبينيات ،حتى الكواش و الناموسيات بانو،علاش هادشي كامل؟باش ايلا جا الشريف ايلقا كلشي مريكل،ساعة الدراري المقهورين مريكلين كتر منو،صوروا الصباغة والخدمة أمارش ونشرو فضيحة تانية فالموقع ديال ناظور24. جوج شوهات ف24 ساعة ،الرئيس ديال الجمعية الخيرية تالف والمندوب ديال التعاون الوطني مالقا ما يدير،ايوا خاص مسيو بنتهامي ايورينا الدم ديال الريافة ويرد الكرامة لهاد اليتامى ويعاونهم راهوم كيعانيو بزاف ،وفي حالة كا كاينش شي تحرك الدراري معولين يكملو معركتهم النضالية من أجل حياة كريمة،من حقهوم.