إعترافات كل أنواع تجار المخدرات بالناظور

مع الشكر للأخ مصطفى الوردي
شيفور زودياك
اسمي (ن) لكن ما يتوفر من أرشيف لدى أجهزة الأمن التي تبحث عني غير ذلك عرفتي علاش؟ هادي حيلة يلجا إليها أغلب شيفورات الزوديكات تفاديا لتدوال أسمائهم الحقيقية بين أيدي البوليس، وأغلب الشيفورات عندهم ألقاب بين أوساط تجارالمخدرات.
عملي يقتضي نقل شحنات المخدرات نحو السواحل الإسبانية، ويرافقني في الرحلة شخصان على الأقل، تكون مهمتهما هي وضع شحنات الحشيش على الساحل الاسباني.
المقابل الذي أتقاضاه عن كل عملية يتراوح مابين 10 ملايين سنتيم و15 ملون سنتيم.أحيانا قد يتجاوز المبلغ هذا السعر، وذلك في حالتين:
الأولى حين يكون عدد من الشيفورات في السجن أو حالة فرار خارج المنطقة، آنذاك يصبح شيفور الزودياك عملة نادرة،
و الثانية الثمن كيزيد يطلع حين نقوم بنقل بعض الحراكة على متن زودياكت الحشيش مقابل مبالغ مالية. منها نضورو الناعورة ومنها نديو أجر فهاد الحراكة.
بغيتي تعرف كيفاش كنخرجو بالزودياكات؟ أنا غير شفور ومول الحشيش هو اللي كيتفاهم مع شي ناس فالمخزن على النهار والساعة اللي خاصني نخرج فيها بالزودياك. لكن أنا فراسي لخبار كاملة، من قبل كنا كنخرجو الزوديات من مارتشيكا(بحيرة قرب الناظور) كانو شي مخازنية هوما اللي كيوجدو لينا الطريق، ونريد نكول ليك واحد القضية تضحك، شي عناصر من المخازنية اللي كيكونو عساسين في “مارتشيكا” كيعاونو الحمالة.
أجي واش ماشفتيش هداك البرنامج اللي صورو فيه صحافيين فرنساويين المخازنية وهوما كيهزو الحشيش وكيحطوه فالزودياكات؟ فرشة خايبة.
المطلوب مني هو أنني نبقى عاقل على كلمة السر اللي عطاها ليا المعلم باش نكولها للمخازنية باش يخليوني ندوز.أييه هاد الشئ فيه كلمة سر وشنو كيسحاب ليك؟
راه شحال من تاجر مخدرات دوز الزودياكات ديالو في البلاصة ديال واحد آخر خلص عليها الفلوس قبل سنة 2006 كانت مارتشيكا بحال محطة القامرة اللي عندكم فالرباط، الزودياكات كيخرجو بالعلالي. بعد الحملة خرجنا للبحر الكبير والقرية ومن تما ولينا كنخرجو.
الطريق إلى إسبانيا ماشي دائما مفروشة بالورود، إذا يحدث أحيانا أن نصادف أثناء الطريق دورية خفر السواحل الأسبانية. تعليمات مالك المخدرات واضحة، وهي أن نتخلص من الحشيش ونلقي به في عرض البحر، لأن مول الشي يدرك أن ضبط الحشيش في الزودياك يعني تحقيقا مع الشيفور وبالتالي الوصول إلى مول مالك الزودياك. المهم يدير بناقص من ذلك الحشيش.
لكن الصبليون ولاو مطورين بزاف، حيث أصبح بعض شيفورات الزودياكات يفاجؤون بصور لهم أثناء انشغالهم بالقاء الحشيش في عرض البحر مهنة شيفور الزودياك لا تخلو من مخاطر، وليست مهنة في المتناول الكثير من الشيفورات لا يقفون وراء مقود الزودياك إلا من بعد ما يضربو شي سطر أو جوج ديال الكوكايين، السرعة اللي كيمشي بيها الزودياك تتطلب كثيرا من التركيز وقوة الانتباه.
واش عرفتي شحال كيدير الزودياك من مارتشيكا لاسبانيا؟ 20 و30دقيقة، و يلا شاف الشيفور غير فاليمين ولا فاليسار يتقلب الزودياك.
بعض شيفورات الزودياك عماهم الطمع وكدبو على مالين الشي وتصرفو فالحشيش وباعوه بلا خبار مولاه النهاية ديالهم كانت خالية، كاين اللي لقاوه غارق فالبحر وفيهم اللي مات بطريق مجهولة.
ملي كنوصلو الحشيش لاسبانيا، عندنا جوج طرق نرجعو بيها للمغرب غالبية الشيفورات ملي كيوصلو لاسبانيا كيفشو الزودياكات، كاين فيهم اللي عندو لوراق ديال إسبانيا و كيرجع فالباطو بطريقة عادية واللي ماعندوش لأوراق بحالي، كيمشي عند البوليس ديال إسبانيا وكيكول ليهم بأنه كان حارك وبغا يرجع لبلادو وكيرجعوه في الحال، الصبليون طلعنا ليهم فالراس،
الحرفة ديالنا دخليتها المنافسة وبعض شيفورات الزودياكات ولاو كيجيو من سبانيا باش يوصلو الحشيش هاد الصبليون مجهزين راسهم وعندهم واحد الجهاز سميتو “جي بي اس” كيعرفو بيه الحالة ديال البحر والطريق واش فيها العسة و لا لا، الحاصول هاد الصبليون تبعونا حتى فهاد الخدمة الله يستر وخلاص./.
مزارع حشيش
تهمتي هي زراعة القنب الهندي والاتجار الدولي في المخدرات واخا أنا ماكنتاجرش فيه عارف العقوبة الحبسية اللي كتسناني من 5 سنين حتى 10 سنين، وربما اكثر بزاف ديال المزارعين بحالي اللي عايشين فكتامة من هنا بداو و ماتسناش مني نكول ليك أن من هنا غادي تكون النهاية عرفتي علاش؟ لأنني ماعمري غادي نوقف هاد الفلاحة، زرع القنب الهندي بالنسبة إلى سكان المنطقة بحال يلا كيفلحو البصلة،ولا ماطيشة بحال بحال من نهار حلينا عينينا وحنا خدامين فهادا الشي حرنا مع هاد المخزن مرة كيخليك تزرع الحشيش، ومرة كيجي يحركو ليك واحد المرة الجضارمية كالو لشي واحد حركوليه الحشيش: “غير صبر هادي غير حملة ودايزة وخاص التلفزة تلقا ما تصور”، المرحلة الأصعب بالنسبة إلى عدد من المزارعين بالمنطقة تتمثل في اللحظة التي يتم فيها جني المحصول وتخزينه، في انتظار قدوم المشتري آنذك كنوليو نلعبو كاشكاش مع المخزن، الديور اللي كيتخزن فيها الحشيش ملي كنرجعوه بلايك كتبدل من موسم لأخر، بعض السكان يؤجرون مسكانهم الخاصة لأجل هذا الغرض مقابل مبالغ مالية جد مهمة، ماشي مشكل يلا تجمعات العائلة فبيت واحد ليومين أو أسبوع كامل، الناس عطيهم غير الفلاوس يبات هو و ولادو فالزنقة ويخليو ديورهم فين يبات الحشيش. حين يتم تخزين هذا الأخير، أقوم بالاتصال مع المشتري ديال كل عام كيصيفط اللي كيشوف السلعة ويدي منها الشانتيون بعد ذلك نتقف على الثمن وعلى موعد التسليم.
أكثر ما يقلق مزارعي الحشيش هو أن تبقى سلعتهم مخزنة لفتر طويلة داخل المخازن عرفتي هلاش ؟، لآن كل نهار كيدوز كيحطو فيه زيالة ديال الفلوس لمول الدار اللي خازنين عندو فيها الحشيش طبعا دون أن ننسى المبالغ المالية الكبيرة التي يطالب بها المسؤولون في السلطة المحلية من المقدم وأنت غادي كيطلبو منا الفلوس بحال يلا كيسالوها لينا،
زراعة المخدرات في منطقة كتامة لم تعد مثل السابق اليوم أصبح الكثير من المزارعين في وضعية مالية جد صعبة حتى أن البعض منهم أصبح يتسلم المال من المشتري من أجل زراعة محصوله، طبعا في الأخير كيقطعو ليه.
الكثير من سكان المنطقة مطلوبون أمام القضاء بتهم زراعة القنب الهندي، وأنا واحد منهم عناويننا معروفة لديهم، لكن قلما يتم اعتقال فرد منا عرفتي علاش؟ باش يلقاو السبة كل مرة منين يحلبوك حنا راه عيينا وشي فلوس ما بقات عندنا./.
تاجر الكوكايين
بعد أكثر من أربع سنوات من الاتجار في الكوكايين والهروين بإسبانيا وهولندا، قررت الاستقرار في المغرب وممارسة هذا النشاط بمنطقة الناظور، أخويا المخزن في أوروبا ما كيتساهلش وما عندوش كع دهن السير يسير ماشي بحال المخزن ديالنا زايدون اكتشفت أن خوتنا المغاربة ولى عندهم مع الكوكايين، والهروين كما أنني اكتشفت ان ثمن استهلاك الكوكايين هو نفسه في الخارج في أوربا يصل ثمن الكرام الواحد من الكوكايين إلى 60أورو، وفي المغرب يصل إلى 600درهم، ونفس الأمر ينطبق على الكرام الواحد من هيروين، حيث يصل سعر الكرام في أوربا 40 أورو، وفي المغرب يمكن أن تقتني نفس الكمية ب 400درهم، لهذه الأسباب قررت الاستقرار في المغرب بالضبط في منطقة الريف التي انتمي إليها،
في البداية واجهتي بعض الصعوبات والمتاعب في ممارسة نشاطي،المشكل الأول تمثل في ضعف الإقبال على الكوكايين، نظرا لاحتكار بعض التجار للسوق لذا لجأت إلى تخفيض بسيط في الثمن كنت مجبرا على ذلك وهذا هو منطق السوق لكن التجارة ستزداد نشاطا مباشرة بعد إلقاء القبض على احد كبار التجار في هذا الصنف وهو المدعو(ب)، هذا الوضع الجديد ساهم في اتجاه عدد من المدمنين نحوي.
طريقة إدخال الكوكايين إلى المغرب أسهل بكثير من إخراج شحنات المخدرات نحو اسبانيا في البداية كنت اجلب السلعة عبر شركاء لي في هولندا كانوا يتكلفون بإدخالها إلى المغرب لكن بعد توالي ضبط دخول كميات من الكوكايين كانت متجهة نحوي، لجأت إلى شبكة دولة متخصصة في الاتجار في الكوكايين حيث أصبح هذاالمخدر يصلني حيث أوجد، في الحقيقة هادي طريقة أحسن واخا كتقام السلعة عليا غالية شي شوية، ولكن ما كنخرج الدورو من جيبي إلا والسلعة عندي وما شي سوقي يلا تشدات فالديوانة فاللول قبل أن أربط علاقة مع الشبكة الدولية للمخدرات كان أصدقائي يدخلون كمية تتراوح بين كيلوا أو اثنين من الكوكايين داخل سيارات حيث يتم تفريق هذه الكمية في أجزاء مختلفة من السيارة يصعب ضبطها وغالبا ما كانت تتم جميع هذه العمليات عبر مينائي مليلية وبني انصار، يمكن تما الديوانة ساهلة وطبعا بإضافة إلى هذاك الشي اللي فراسك.
أمارس هذه التجارة منذ أزيد من سنتين ولا انكر أنني واجهت العديد من المتاعب خاصة من صحاب الوقت ولكن كلشي بالثمن ديالو وهاد الشي اللي زوين فالمغرب من أجل التستر على نشاطي خصصت أغلفة مالية شهرية لبعض مسؤولي الأمن والدرك وبع المرات كنضور مع البوليس و الجضارمية الصغار كلهم كيعرفوني ملي كندوز من قدامهم بالطوموبيل كلشي كيعطيني السلام بحال شي وزير ما كدبوش اللي كالو بلي الفلوس يمكن ليها دير الطريق فالبحر وكن حتى حاجة ما كتمشي فلخوا لأن هادو هوما اللي كيعلموني باش نوقف النشاط ديالي ملي كيكترو عليا الشكايات، فهاد الحالة كنوقف الأنشطة ديالي ولكن حتى حاجة ماكتضيع لأن الأيام اللي كنوقف فيها كيطلع فيها الثمن ديال الكوكايين والهروين وملي كنرجع للسوق كنبيع بالثمن اللي بغيت أصبحت اليوم واحد من المطلوبين للعدالة كالك أسيدي بزاف ديال تجار المخدرات بالتقسيط اللي شدوهم اعتارفوليهم بلي شراو السلعة من عندي ولكن نهار اللي غادي نطيح طبعا ماغنديش نطيح بوحدي كالك ثلاثة ما تقيش فيهم الما و العافيه والمخزن،
مبيض الأموال.
أمضيت مدة غير قصيرة كموظف في إحدى المؤسسات البنكية اشتغلت بهذه الصفة في عدد من المدن المغربية قبل أن أعين في واحد من مدن الريف،
امضيت في المنصب الجديد سنتين على الأقل، استطعت خلالها أن أنسج علاقات مميزة مع عدد من “رجال الأعمال” بالمدينة كان هؤلاء يغدقون علي الكثير من الهدايا بمناسبة و بدونها وكنت كنكول مع راسي هادي هي الخدمة و إلا فلا،
خلال مدة عملي توطدت علاقتي برجال الأعمال هؤلاء بشكل كبير، إلى حدود اليوم الذي تقدم إلي فيه احدهم بعرض أن أعمل كوسيط بينهم وبين تجارة المخدرات في الخارج، حيث اقترح علي بارون المخدرات، (ما بقاش رجل الأعمال) أن أتكفل بمساعدتهم على تبييض الأموال المتحصل عليها من تجارة المخدرات مقابل عمولة مالية مهمة في البداية ترددت في قبول العرض لكن العمولة كانت بالقدر المغري لقبول فكرة ركوب المغامرة وعلى هذا النحو كانت تتم العملية عندما تصل المخدرات إلى البر الأوربي، يقوم الشخص الذي يتسلم البضاعة بمنح المال بالعملة الصعبة لشخص يكون محل ثقة لدى بارون المخدرات، آنذلك تبدأ مرحلة جديدة تتمثل في إدخال الأموال إلى المغرب ولأن القانون المغربي أصبح متشددا في عملية إدخال الأموال من الخارج خوفا من استثمارها من طرف التنظيمات الإرهابية من جهة، وكذا بعد الحرب التي شنتها الدولة ضد تبييض الأموال في المغرب من جهة ثانية، فقد كانت أفضل طريقة لإدخال الأموال إلى المغرب هي المرور عبر مينائي سبتة و مليلية، حيث كانت تصل الأموال في سيارات متفرقة ومخبأة داخل أغراض منزلية خوفا من رصدها من طرف الجمارك الاسبانية أما الديوانة ديال المغرب ... لخبار فراسكم بعد ذلك يتم تجميع تلك الأموال لتبدأ مرحلة أخرى،
اريد فقط أن أشير إلى أن الأشخاص الذين يقومون بإدخال هذه الأموال يحصلوا علي نسبة من تلك الأموال تتراوح بين 3و5 في المائة كان كيشيط ليهم الخير والخمير ومع القانون الجديد الذي احدث ضد تبييض الأموال بالمغرب والذي يفرض تبرير المبالغ المالية التي يتم وضعها في أي حساب بنكي فإن بعض مدراء البنوك يلجأ إلى معالجة الأمر مع عدد من المحامين والموثقين وخبراء الحسابات بهدف خلق أوراق مزورة لتبرير مصدر تلك الأموال التي يتم إدخالها في الحساب البنكية لتاجر المخدرات أو باسم أفراد ينتمون إلى عائلته يكونون محل ثقته، وإذا كان المبلغ المالي أكبر من أن يتم التستر عيه فإن جزءا من ذلك المال يحول إلى عقارات ومشاريع استثمارية سواء بالريف أو في مدن أخرى،
لكن الحلقة الأصعب في عملية تبيين الأموال من طرف البنوك يتكلف بها مدير المؤسسة البنكية الذي يتوفر على طاقم من الشركاء المتدخلين في هذه العملية ضمنهم بعض المحامين والمحاسبين والموثقين ممن يجتهدون في إيجاد تبرير لمصادر الأموال بواسطة وثائق تكون محكمة التزوير باش مانساش حتى صحاب الحال كياخدو حقهم من هادي الشي زعما ما عايقينش هوما بهاد الشي؟ راهم ساكتين وعارفين علاش./.
الحمال.
قبل سنوات، كنت خدام حمال فالسوق، صنادق البصلة والبطاطا طيحوليا كتافي، فآخر النهار كنلقا راسي مصور 100دورو ( 50درهم) تقريبا، واحد النهار اقترح عليا صاحبي نبدل الحرفة مع الاحتفاظ بالصفة عوض باش نهزو صنادق الخضرة نبقاو نهزو الحشيش ونحطوه فالزودياكات اللي فمارتشيكا في البداية رفضت الأمر. وكلت مع راسي آش داني لهاد الخواض.
لكنني لم أصمد كثير حين تذكرت تمارة ديال المارشي وصناق الخضرة الثقيلة، في بداية اشغالي كحمال انطلقت من مارتشيكا، هناك كنت انتظر وصول سيارات مملوءة بالحشيش وكنت رفقة شبان آخرين، أتكلف بوضع المخدرات في الزودياكات، شي مخازنية الله يخليهم، كانو بعض المرات كيديرو معانا يد الله و كيعاونونا. كانت غير نص ساعة ديال الخدمة كتخلي فجيببي 500درهم كل ليلة،
من بعد دوزت برمي وشريت مرسيديس مضروبة يعني وراقها مدرحين حتى أنا وليت كنهز الحشيش فالناظور من الديور اللي كيكون مخزون فيها حتى للبلاصة اللي غادي يخرجو منها الزودياكات البوليس و الجضارمية وحتى الديوانة كيعرفو الطوموبيلات اللي كيهزو الحشيش.
في غالب الأحيان كتكون الطريق مشرية، لكن إذا حدث وأصرت دورية على تفتيش السيارة كنضرب فيها وكنزيد.
ماعمري كنسكت الطوموبيل ديما ملي كنكون واقف فالباراج عندهم كنخليها يروميير، يلا شدو التدويرة راحنا بخير، دارو فيها شوية ديال النزاهة كنضرب فيهم وكنزيد،
نقل الحشيش من مخازن بالناظور إلى نقطة ترحيله يدر الكثير من المال كنت أتقاضى عن العملية الواحدة ما بين عشرة الآف درهم و15 ألف درهم لكن الفلوس الصحيحة هي انك تجيب الحشيش من كتامة حتى الناظور، أو تديه من الناظور لمدن آخرى فالداخل.
فكرت في خوض مغامرة نقل الحشيش من كتامة نحو الناظور المقابل المادي مابين 10و15مليون سنتيم. وبدأت مزاولة نشاطي على هذا الأساس، حيث كنت أقوم بشحن كميات كبيرة من مخدرات الشيرا من كتامة إلى احد المخازن في مدينة الناظور كان التاجر الكبير يخبرني بتاريخ ذهابي إلى كتامة قبل الموعد بيوم واحد فقط،
أثناء تحميل الشحنة والعودة إلى الناظور كنت أمنح دوريات الدرك في الطريق مبالغ مالية، ولم يكن أحد في هذه الدوريات يوقف السيارة أو حتى يده ليفتش محتوياتها، كانوا يعلمون انني أحمل الحشيش وأضعه داخل صناديق أضع فوقها بعض الأنواع من الخضروات حيت هوما اللي طلبو مني هاد الشي.
واش كاينة شي خضرة كتجي من كتامة؟ تساهل رجال الدرك ليس مرده إلى المال الذي يتسلموه مني فقط، فحتى مزارعو الحشيش يخصصون نصيبا من المال للجضارمية، لكونهم يدركون أن تشديد الحراسة على عدم مرور الحشيش خارج كتامة لا يعني إلا شيأ واحدا هو إصابة تجارتهم بالكساد.
الوقت تبدلات شوي والجضارمية الليكانو كيقنعو باللي عطيتيهم كرشهم كبرات وولاو كيطلبو بزاف ديال لفلوس.وأنا وليت روشيرشي كثر عند المخزن أنا و مجموعة من الحمالة بدلنا الطريق ولينا كنمشيو غير على الطرقان اللي مافيهاش العسة وسط الدواور والعروبيات حتى كنوصلوا السلعة،
صحيح أن المقابل المادي لهذا العمل زاد شي شوية ولكن الخطورة زادت حتى هي. دابا ولاو كيخرجو لينا الشفارة وقطاع الطرق وكيبغيو يديو لينا السلعة بالقوة، شحال من حمال تلقى مقتول في الخلا. هاد الشي لاش ولينا كنخرجو بزاف بينا. ماحيلتك للمخزن ما حيلتك للبانضية.
روبورتاج القناة الثانية حول إلقاء القبض على الشبكة
مقطعي فيديو لعمليات تهريب للمخدرات من الشواطئ المغربية نحو إسبانيا
مطاردات هيليكوبترات إسبانية لزودياكات حشيش مغربي