مراد هربال يكتب : كلاشات دورة فبراير لمجالس الجماعات بإقليم الناظور

“زغرتي يامي راني مستشار ورئيس فالجماعة” بعد مرور ثلاث سنوات ونصف، بغيت نشارك الإخوة والزوار ديالنا في أريفينو.نت في هد الرأي بخصوص دورة فبراير لمجالس الجماعات ديال اقليم الناظور، لي دازت لحد الآن بداريجة. باش حتى هدوك المستشارين(المرشحين) العباقرة إفهموني.
اليوم تأكدت بالملموس مستوى نتاع 99 بالمائة من أعضاء المجالس اللي كيسيروا الشأن العام ديال الإقليم (مع كل احترامي وتقديري باللغة العربية الفصحى لبعضهم)، مكيفرقوش مابين دبير الفائض وبين الفيضان، و الغطاية ديال الروكار ومابين الروكار نفسه،وما بين المستشفى والمستوصف. وعرفت علاش مكيبغيوش بعض رؤساء المصالح الخارجية و ممثلي الادارات إجيو احضرو دورات هذه المجالس، وحتى اللي كيحضرو كيدوزوا الجلسة حشمانين من المستوى الضعيف ديال المستشارين، وعاد عرفت كذلك علاش اقليم الناظور تبلوكا مسكين.
الحصول بقيت متبع بعض المداخلات ديال نقطة تخصيص ميزانية لتجهيزات المستشفى الاقليمي الحسني ، فموضوع الصحة، بقاو البعض كيتكلمو على السيكيريتي (العساس دلباب)وشي مشاكل شخصية.والفضيحة فواحد المجلس،غير بدا ممثل الصحة بواحد اللغة كانت فيها بزاف ديال الفرنسية وبقيت كنشوف فوجه شي بعضين مكرهوش إقلوليه هضر بالعربية "عفوا" درج الشاف، و ضحكوني حيت حتى واحد ماعلق عليه .والروينة الكحلة فمجلس قروي صحاب ليهم، القايد قال ليهم ديرو ملتمس اديرو ليكم مستوصف. المهم الحباب البركة فراسكم و الإقليم مشا فالخسران أحمادي.