قصيدة زجلية : تحية لك يا تنجداد

تحية لك يا تنجداد
عليك ربي بفضلو جاد
بالخيرات عل لشكال
اللي غطات مدن أجبال
بابك يا تنجداد ديما مفتوح
في وجه كل من جا يزور
والسايح بهواك قلبو مشروح
بحق الضيافة فرحان أمسرور
فيك النسا بغطاهم المشهور
والرجال بالرزة والجلابة
فيك النخل المكسي بالتمور
وطبيعتك يا لالة خلابة
أفيك الويدان ولقصور
لعيون السايح جذابة
يكفيه البسمة والطيبة
المرسسومة على وجوه الشيوخ والشبان
وأتاي بالنعناع ولى بالشيبة
أراحة البال فكل مكان
تحية لك يا تنجداد
يا أرض العادات والتقاليد
والطقوس على الألوان
فكل موسم أعيد
فيك الخاوة بين جميع السكان
والثقافات متعايشة
لا جور لا طغيان
لا قبايل هايشة
دازت أيام زمان
وليوم الناس فالهنا عايشة
تحية لك يا تنجداد
وخى بكات عليك الاكباد
بسباب هاد الجفاف
اللي بدل وجه الواحة
بالحق مولانا خلاف
نقولوها بالنية والصراحة