النزاهه..ف..الغمه..

ملي ضاقت بي
عطيت براسي للسفر
ف بلاد الظلمه...
تنزرع لعمر.
بين الارض والسما
ضيقني الحال
خرجت من راسي
تنعبر ف قياسي والحروف ميترو
فيدي كلها حكمه
شفتني مزحوم
ماحلتي نخنقني
ونغرقني
ماحلتي نعوم
ف زحمه مابحالها زحمه
*****
مكتفاني كتفاني
غ مع حدايا نعاني
حناجري مشحفاني
يدي مروناني
وجهي زايدني غمه
يحسن لعوان
*****
عرق بعرق تايموت فيا الانسان
ف دواخلي تابكه عوافي ومحان
ف السما
ضرباها عين بلعما
*****
متنرتاح .....!!!
غير وأنا دايها فراسي
متنهرق غير وانا على كراسي
متانتساع
غير وأنا فدحاسي
الضيق والعداوا................ الضيق ..
لقيته كله ف ناسي
تخنقت لحروف فدواخلي
تنخصصت
ومسحت دموعها
ومن بعد ما قطعت ياسي
*****
عنقتني وتعلقت ف خيالي
وضربت ف السداسي
مربوط مع الخماسي..
دويت مع عقلي..
هو هضره
وأنا جوابها
أنا نظره
هو اللي جابها
وهكذا مشينا
مسيرين ليام
متوانسين بالتخمام
تانتبادلوا بالكلام.
*****
الشوفه قدامنا طريق
حدها القبر
العيشه مقزوزة
مداقها زعيق
معاديينها غير بالصبر
*****
القنطه زايده وتفرعن
والغمه تنخص ف الضهر
حلمنا بداك الشجره
اللي كنا عوالين عل ظلها
يدفينا
تقرعت وطاح منها الزهر..
*****
تكادوا لكتاف أعمي
مابقى فيها صغير ولا كبير
بنادم من طبعته لغدر
*****
الفراجة مابقات تحرك لكتاب
بالطار والبندير
والضباب مايخفي الدموع
من خدود لقمر
كنت حلفت مانزيد حرف..
مانضرب ضربه
لقيتني ممنوع من الصرف
ماتواتيني هربه
عاد..
فيدنا القلم
*****
محراث
وطلقت السطر
تمديت فوقه
دفنت لعمر..
وسترت عروقه
لا تحكرني ياسيدي
لاتحكريني يالاله
من جهت الحكره جاي
*****
راني غ مجنون
والسوق الخاوي ماندخل سوقه
والغشاش
العامر تلاوي
مانعشره مانكون بوقه