مقربلة فالجديدة على أوديو لبارون كبير ديال المخدرات فرش فيه مسؤولين ومنتخبين عاطيهم ملايين صحاح والفرقة الوطنية غاتدخل على الخط

واحد التسجيل تايدور بشكل كبير فالواتساب ومواقع التواصل الاجتماعي، البطل ديالو بارون مخدرات كبير معروف بإقليم الجديدة، واللي تسرب ليه تسجيل تايفرش فيه عدد كبير من شخصيات ومسؤولين ومنتخبين وغيرهم..، تايقول فيه بلي مسلفهم فلوس صحاح، وتايطلب منهم يرجعو ليه فلوسو، كاين للي مسلفو 400 مليون، ها مول 200 مليون، و50 مليون وزيد وزيد واللائحة طويلة، على حساب التسجيل.
بعض الصفحات الفيسبوكية لاحت هاد الأوديو لي بصراحة صادم بزاف، وطالبو باش العدالة تحقق فالمعطيات لي جات على لسان هاد البارون.
وحسب مصدر "كود" فالقضية مرونة ومقربلة فالجديدة، والفرقة الوطنية غاتستامع لكل واحد تجبدات سميتو فالأوديو، خصوصا المسؤولين الكبار والمنتخبين، باش يعرفو أشنو الخدمات لي كانو تايقدموها لهاد البارون مقابل هاد المبالغ الخيالية. وغادي تبدا حملة اعتقالات لكل واحد تبت أنه متورط فالتعامل في قضايا لها ارتباط بالإجرام أو مخالفة القانون.