المسيحية بدات تتصالح مع المثلية..البابا فرنسيس: للي عندهم هاد الميول هوما ابناء الله وخص ترحب بهم الكنائس ديالهم

قال موقع " بي بي سي نيوز" ان البابا فرنسيس وزعماء الكنائس البروتستانتية فإنجلترا واسكتلندا كيستنكرو تجريم المثلية الجنسية.
واضاف الموقع انه البابا فرنسيس فحديثو للصحافة بعد زيارة ليه فجنوب السودان ، قال أن القوانين اللي كتجرم المثلية الجنسية خطيئة و "ظلم"، وأن الأشخاص اللي عندهم ميول جنسية مثلية هم أبناء الله وخص ترحب بهم الكنائس ديالهم".
وأيد تصريحاتو رئيس أساقفة كانتربري،وإيان جرينشيلدز ، مدير الجمعية العامة لكنيسة اسكتلند، اللي كانو معاه فنفس الرحلة لجنوب السودان حيث دعوا معًا للسلام فالدولة اللي دمراتها الحرب.
وعبر رئيس الأساقفة ويلبي عن تأييدو لتصريحات البابا فرانسيس مشيرا لأن الكنيسة الأنجليكانية عندها انقساماتها الداخلية حول حقوق المثليين.
وفهاد الإطار كانت قالت كنيسة إنجلترا الشهر الفايت انها غترفض السماح للأزواج من نفس الجنس بالزواج فكنائسها.
وأشار الدكتور جرينشيلدز على انه فالأناجيل لأربعة كيشوف غير يسوع كيعبر على الحب ديالو للناس اللي كيتلاقا ، وأضاف أنه" حنا كمسيحيين هذا هو التعبير الوحيد اللي خصنا نعطيو للأخرين".
وخلال المؤتمر الصحفي ، كرر البابا فرانسيس بأن الكنيسة الكاثوليكية ميمكنش تسمح بالزواج الأسري للأزواج من نفس الجنس ولكن كيأيد تشريع الزواج المدني