كيما كشف "كود" فوقت سابق.. نوفل الزرهوني رجاوي والخضرا علنت على الصفقة

سنا نوفل الزرهوني مع الرجاء الرياضي فهاد الميركاتو الشتوي، باش يلعب مع الخضرا المنافسات اللي جايا واللي باغي يخرج منها الفريق هاد الموسم رابح لقب ولا لقبين على الأقل.
وكيفما كان قال "كود" فوقت سابق نوفل الزرهوني اللاعب ديال الحزم السعودي، سنا مع الرجاء الرياضي لمدة ديال 6 أشهر وغادي يلعب مع الخضرا حتى يسالي الموسم، والنادي علن قبل لحظات على أن اللاعب صبح رجاوي.
وهادي هي الصفقة الثانية ديال الرجاء الرياضي فهاد الميركاتو، من بعد زكرياء الوردي اللي رجع من تجربة فاشلة بمصر مع الزمالك، ولكن جماهير الرجاء ما قنعاش وعطات لرئيس الفريق عزيز البدراوي آخر فرصة فين يصلح الوضع فهاد المرحلة باش يجيب لاعبين مزيانين ولا يحط السوارت ويرحل.