واش لي تحرمو من الفيزا ماشي مغاربة؟..الوزير بنسعيد تدخل للفنانة بنشليخة وراجلها ياخدو الفيزا فالسفارة الفرنسية فالوقت لي المئات من المغاربة مكاين لي تسوق ليهم

فضيحة كبيرة دارها وزير الشباب والثقافة والتواصل مهدي بنسعيد، فاش تدخل عند السفارة الفرنسية بالرباط، باش الفنانة منال بنشليخة وزوجها ياخدو الفيزا.
بنشليخة قالت فالستوري على الانستغرام، أنها خدات مع راجلها الفيزا الفرنسية، بتدخل من وزير الثقافة المهدي بنسعيد، وعلنات توصلها باعتذار من السفارة.
هاد التصرف لي دار بنسعيد، تصرف غريب من وزير كيدير تدخلات لمن ولى، وغير هوما، اما باقي المغاربة لي عندهم مشاكل الفيزا مكاينش بنسعيد يتدخل ليهم.
بهاد التصرف كيكرس وزير الثقافة ثقافة باك صاحبي، لي عندو معارف يخرج لباريس واللي معندوش يبرك.
وكيبقا السؤال اشنو علاقة بنسعيد بالسفارة الفرنسية باش يقضيو ليه هاد الغرض؟.
يشا بلي السفارة كانت قد رفضت طلب الزوجين الحصول على تأشيرات، كيفما دارت مع المئات من المغاربة.