شكون لبس اللاعبين ديال المنتخب فحفل الاستقبال بالرباط وفركسهم؟ (تصاور)

انبهر كل من تابع استقبال بعثة المنتخب الوطني المغربي عند العودة ديالها البارح من قطر إلى المغرب بعد الإنجاز التاريخي فكأس العالم 2022، بأناقة اللعابا ديال ليكيب ناسيونال اللي طافو فشوارع سلا والرباط قبل ما يوصلو للقصر الملكي وتلقاو بالملك محمد السادس اللي وشحهم بأوسمة ملكية.
اللاعبين ديال المنتخب الوطني المغربي الظهور ديالهم اليوم كان مختلف، وعكس الأيام العادية فالمباريات والتداريب اللي تعود فيها الجمهور يشوفهم بتوني وسيرفيط، اليوم كانوا لابسين بدلة رسمية أنيقة بانو بها فأحسن مظهر وهم كيطوفو فالشوارع وكيحييو المغاربة ودخلو بها للقصر الملكي عند سيدنا.
وكيف ما كانت البصمة المغربية حاضرة فكاس العالم 2022، حتى اللبسة الرسمية لأفراد المنتخب الوطني المغربي كانت من صنع مغربي من خلال ماركة"AM" ، اللي الشعار ديالها هو اختصار لاسم مولاها علال منور، المصمم المغربي اللي بدع فالتصميم ديالو، حيث الأسود كان المظهر ديالهم واعر من لافيست والشوميز حتى لسروال والصباط.
للإشارة فالمنتخب الوطني المغربي رجع اليوم إلى المغرب، ودار جولة بشوارع سلا والرباط فطريق من المطار إلى القصر الملكي، واستقبل الملك محمد السادس أفراد ليكيب ناسيونال مع الأمهات ديالهم وشحهم بأوسمة ملكية احتفاء بهم على احتلال المنتخب الوطني المغربي المركز الرابع فكأس العالم قطر 2022، فانجاز غير مسبوق لكرة القدم المغربية والعربية والأفريقية.