كيتعتبر الوداد الرياضي بطل المغرب وإفريقيا من الأندية اللي عندها أكبر عدد ديال اللعابا فنصف نهائي كاس العالم قطر 2022، من بعدما حققو تأهل تاريخي رفقة المنتخب الوطني المغربي لهاد الدور فإنجاز غير مسبوق لكرة القدم المغربية والإفريقية والعربية. وكيتواجد الوداد الرياضي بالمركز 4 فترتيب الفرق اللي عندها لعابا مشاركين مع المنتخبات ديال بلدانهم فأكس العالم قطر 2022، برصيد 3 لاعبين هم يحيى عطية الله مفاجأة المونديال فالجهة اليسرى، ويحيى جبران ولكول رضا التكناوتي. وكيجي الوداد الرياضي فالمركز 4 إلى جانب كل من باريس سان جيرمان اللي حتى هو عندو 3 اللعابا فنصف النهائي من بينهم المغربي أشرف حكيمي والفرنسي كيليان مبايي والأرجنتيني ليونيل ميسي وفريق توتنهام الننكليزي ويوفنتوس الإيطالي. أما أكثر فريق حاضرين اللعابا ديالو فنصف نهائي كأس العالم 2022، فهو بايرن ميونيخ اللي عندو 6 العناصر، والمركز الثاني فيه كل من إشبلية الإسباني برصيد 5 لاعبين من بينهم المغربيان ياسين بونو ويوسف النصيري، وأتليتيكو مدريد بنفس العدد من اللعاب، وكيجي دينامو زاكريب الكرواتي برصيد 4 اللعابا وريال مدريد الإسباني بنفس العدد. للإشارة فالوداد الرياضي هو الفريق الوحيد من البطولة الإحترافية اللي خدا منو وليد الركراكي لعابا باش يشاركو مع المنتخب الوطني المغربي فكأس العالم 2022، مع العلم أن المنتوج المحلي حاضر فليكيب ناسيونال بقوة، حيث مشارك بدر بانون اللعاب السابق الرجاء الرياضي وجواد يميق اللعاب السابق الرجاء الرياضي أولمبيك خريبكة وأشرف داري اللعاب السابق ديال الوداد هو وياسين بونو، ونايف أكرد اللي سبق له لعب فالفتح الرياضي وأكاديمية محمد السادس، ويوسف النصيري حتى هو من أكاديمية محمد السادس، وأيضا عبد الرزاق حمد الله اللاعب السابق لأولمبيك أسفي.
