ها شحال د لفلوس ساوية خدمات المغاربة وسط منتخبات ربع المونديال

كيتعتبر المنتخب الوطني المغربي المنتخب الأصغر من ناحية القيمة التسويقية الخاصة بخدمات اللعابا ديالو، من بين المنتخبات ديال ربع نهائي كأس العالم قطر 2022، بالمقابل فالمنتخب البرتغالي خصم الأسود فهاد الدور كيجي مع المنتخبات الأعلى قيمة تسويقية.
وحسب موقع "ترانسفير ماركيت" المتخصص فقيمة اللعابا ديال العالم والانتقالات، فكيحتل المنتخب الوطني المغربي المركز 8 من ناحية القيمة التسويقية ديال اللعابا فترتيب المنتخبات الثمانية اللي تأهلت لربع نهائي مونديال 2022، بقيمة مالية كتبلغ 241 مليون أورو، أما بالنسبة للمنتخب البرتغالي الخصم ديال ليكيب ناسيونال فربع النهائي فكيحتل المركز 4، فالقيمة التسويقية ديال اللعابا البرتغاليين واصلة إلى 937 مليون أورو.
وبنسبة لصدارة القيمة التسوقية للعابا ديال المنتخبات اللي تأهلت لربع نهائي كأس العالم قطر 2022، فكيجيو النكالزا أبطال العالم 1966، فالمركز الأول بقيمة مالية كتوصل لمليار و260 مليون أورو، والبرازيل بطلة العالم 5 المرات 1958، 1962، 1970، 1994، 2002 هي الثانية وواصل مجموع قيمة اللعابا ديالها حاليا لمليار و140 مليون أورو، وكتحتل فرنسا حاملة اللقب المركز الثالث وبطلة العالم 2 المرات 1098، و2018 بقيمة تسويقية كتوصل لمبلغ مليار و30 مليون أورو.
البرتغال كتجي فالمركز 4 برصيد 937 مليون أورو، وراها الأرجنتين بطلة العالم 2 مرات، 1978، 1986 وجات فالمركز 5، بقيمة مالية كتوصل لمبلغ 645 مليون أورو، ومن بعدها كاينة هولندا اللي وصلت 3 المرات الفينال فتاريخها بلاما تربح الكأس، (جات) فالمركز 6 من ناحية القيمة التسويقية الخاصة باللعابا ديالها بمبلغ 587 مليون أورو، وكيجي منتخب كرواتيا وصيف بطل العالم 2018، هو السابع بقيمة مالية كتوصل لمبلغ 377 مليون أورو، ثم المنتخب الوطني المغربي ظاهرة كأس العالم 2022 إلى حدود الآن واللي كيجي هو الثامن وكتبلغ القيمة التسويقية الخاصة باللعابا المغاربة 241 مليون أورو.