الفيفا: ها التشكيلة المحتملة ديال المغرب ضد إسبانيا

توقع الاتحاد الدولي لكرة القدم الفيفا التشكيلة ديال المنتخب الوطني المغربي اللي غادي يلعب بها اليوم الثلاثاء فتيران المدينة التعليمية ضد منتخب إسبانيا فثمن نهائي مونديال 2022.
وحسب الاتحاد الدولي فالناخب الوطني وليد الركراكي غادي يحافظ فالماتش ديال ثمن نهائي المونديال ضد إسبانيا، على نفس التشكيلة اللي لعب بها أخر ماتش ضد كندا فدور المجموعات من البطولة، وهي التشكيلة اللي عرفت حضور عبد الحميد الصبيري كرسمي فبلاصة سليم أملاح اللي بدأ 2 ماتشات الاولين ضد كرواتيا وبلجيكا.
الفيفا توقعت تكون التشكيلة ديال المنتخب الوطني المغربي ضد إسبانيا فثمن نهائي المونديال مكونة من لكول ياسين بونو، وأشرف حكيمي، ونايف أكرد، وغانم سايس، ونصير مزراوي، وعبد الحميد الصبيري، وسفيان أمرابط، وعز الدين أوناحي، وحكيم زياش، ويوسف النصيري، وسفيان بوفال.
وغادي يبدا الماتش ما بين المغرب وإسبانيا فثمن نهائي كأس العالم قطر 2022، اليوم الثلاثاء مع 4 لعشية بالتوقيت ديال المغرب فتيران المدينة التعليمية، وهو ماتش كيسعى من خلالو المنتخب الوطني المغربي بقيادة الناخب الوطني وليد الركراكي لكتابة التاريخ والتأهل لأول مرة فتاريخ كرة القدم المغربية لربع نهائي كوب ديموند وإسعاد المغاربة.