النصيري: كنوجدو لثمن المونديال وهدفنا نربحو إسبانيا ونفرحو المغاربة

أكد الدولي المغربي يوسف النصيري بلي اللعابا ديال المنتخب الوطني المغربي واجدين لماتش ثمن النهائي فالمونديال ضد إسبانيا، إنهم كيمشيو خطوة خطوة باغيين يوصلو لأبعد نقطة فكأس العالم قطر 2022.
وكشف يوسف النصيري على الاجواء فليكيب ناسيونال فتصريح لقناة الرياضية بالتزامن مع الحصة التدريبية ديال الاسود اليوم فتيران الدحيل وقال: "الأجواء داخل المنتخب زوينة كيف ما هي من النهار الأول، اللعابا فرحانين وناشطين ومجموعين وكلهم واجدين باش يعطيو الاضافة سوا اللي كيلعبو رسميين أو الاحتياطيين".
وكمل النصيري الكلام ديالو على ماتش ثمن نهائي كأس العالم ضد إسبانيا وقال: "خاصنا نمشيو خطوة بخطوة، دوزنا 3 الماتشات اللي كانوا صعاب علينا قدرنا نربحو فيهم ونتصدرو المجموعة، ودابا كنفكرو فماتش ثمن النهائي ضد اسبانيا ونتمناو نكملو فهاد المستوى باش نفرحو الشعب المغربي".
يوسف النصيري اللي كان ماركا اسبانيا لمونديال 2018، قال على المعرفة ديالو بالكرة الاسبانية بحكم انه كيلعب مع إشبيلية فلاليكا: "الكرة الاسبانية كيعرفها العالم كامل، وحنا غادي ندخلو ضدهم كمنتخب قوي وغادي يعرفو بلي صعيب عليهم يلعبو معنا لعب عادي، وحنا موجدين لهاد الماتش باش نربحو وغادي نخدمو عليه من دابا".