الركراكي: حكيمي ومزراوي وگاع اللعابا واجدين وأبوخلال يقدر يلعب ظهير أيسر

أكد الناخب الوطني بلي أشرف حكيمي ونصير مزراوي واجدين يلعبو فليمن وليسر فماتش غدا الأحد، ما بين المنتخب الوطني المغربي وبلجيكا و وكلشي اللعابا جاهزين الماتش الثاني فكأس العالم.
وقال وليد الركراكي فالندوة الصحافية قبل ماتش المغرب وبلجيكا: "عندنا 3 الأظهرة فلاليست اللي انا المسؤول عليها بالاضافة زكرياء أبو خلال اللي يقدر يلعب ظهير أيسر فحالة ما كانوا عندنا بزاف الإصابات، عندنا 2 ديال الأظهرة فليمن أشرف حكيمي ونصير مزراوي وفليسر عندنا يحيى عطية الله وزكرياء أبوخلال + مزراوي وحكيمي اللي يقدرو يلعبو حتى فليسر".
وزاد وضح الركراكي وقال: "خديت الريسك وهادي هي كورة تقدر تجيك الإصابات وإلى توعتو الأظهرة راه الخدمة ديالي هي نلقا الحل ونلعب اللي غادي يدير لنا الخدمة فهاد لبوسط، والمهم هو أي لعاب دابا فالمنتخب باغي يعطي مستعد يلعب فأي بلاصة حطيتيه".