المحمدي: كنتسناو كرواتيا وباغين نربحوها

أكد الدولي المغربي منير المحمدي لكول ديال المنتخب الوطني المغربي بلي الماتش الأول فكاس العالم 2022، ما بين المغرب وكرواتيا صعيب ومهم بزاف بالنسبة ليكيب ناسيونال وباغين يربحوه حيث النقاط ديالو قيمتها كبيرة.
وقال منير المحمدي الكول الثاني فلائحة وليد الركراكي فتصريح لموقع الجامعة الملكية المغربية لكرة القدم: "عندنا الماتش الأول صعيب ومابقاش بزاف له وكنتسناو غير امتى يبدا كأس العالم، وحنا كنوجدو باش نلعبو ضد كرواتيا وغادي يكون خير".
المحمدي اكد بلي المنتخب جاهز للماتش ديال كرواتيا وقال: "راه حنا واجدين للبطولة وعندنا طموح وغادي نحاولو نبداو كأس العالم مزيان، ونربحو 3 النقاط حيث عارفين بلي مهمة بالنسبة لنا".
وبخصوص الأجواء داخل المعسكر ديال ليكيب ناسيونال قال المحمدي: "الجو فالمنتخب مزيان وهادشي اللي باغي المدرب وليد الركراكي وهادشي راه مزيان وحتى اللعابا الجداد ولفو دغيا على الأجواء ونساجمو مزيان، ولكروب خدام وعندو طموح كبير وهادشي غادي يسهل علينا الأمور باش نديرو نتائج مزيانة".