السوالم حرم بركان من أول رباح فالبطولة

فشل مرة أخرى فريق نهضة بركان فتحقيق أول رباح فالبطولة الإحترافية هاذ الموسم وتعادل مع المضيف ديالو شباب السوالم مساء اليوم السبت فتيران البشير فالمحمدية.
وسالات الماتش ما بين السوالم ونهضة بركان بنتيجة واحد لواحد، وكان نهضة بركان السباق للتسجيل بهدف ماركاه يوسوفو دايو من ضربة جزاء فالدقيقة 33، لكن براكنة ما قدروش يحافضو على الرباح حيث غادي ينجحو السوالم فتحقيق التعادل فالدقيقة 93، بهدف ماركاه مصطفى الصهد بضربة رأسية قاتلة.
وبهاذ التعادل تحصل كل فريق على نقطة واحدة، ورفع شباب السوالم الرصيد ديالو إلى 11 نقطة وكيتشارك مؤقتا المركز الثالث مع الوداد الرياضي وأولمبيك آسفي، أمام نهضة بركان فكيبقى عاجز على تحقيق أول رباح وعندو 3 نقاط، وغارق فأسفل الترتيب.