الوداد رسل ميساج للجمهور ديالو من بعدما ماركا على ريفرز 6 ديال البيوتا وتأهل فالعصبة

وجه الوداد الرياضي الشكر للجمهور ديالو من بعد الانتصار اللي حقق الفريق الأحمر يوم أمس الأحد فتيران المركب الرياضي محمد الخامس بالدار البيضاء، على ريفرز يونايتد النيجيري وضمن التأهل إلى دور ليكروب من دوري أبطال إفريقيا.
الوداد برئاسة سعيد الناصيري ومن بعدما ضرب ريفرز النيجيري بنتيجة 6 لبيوتا لزيرو وسالا الماتش، رسل ميساج للجمهور الأحمر اللي حضر فستاد دونور باش يشجع الوداد، وقال ففيسبوك: "منتدى السؤدد و حماه ... ما دمتم معنا فلا نخشى أحد شكرا لكم".
للإشارة فكان لجمهور الوداد الرياضي دور كبير فالرباح والتأهل اللي حقق الوداد للمرة الثامنة لدور المجموعة فعصبة أبطال إفريقيا، حيث كان الماتش صعيب بزاف وكانت الفرقة محتاجة للدعم ديال الوداديين فالتيران باش يضغطو على الخصم وهو الأمر اللي وقع، فضغط الجمهور جعل اللعابا ديال ريفيرز النيجري يطيحو فالأخطأ وهو الأمر اللي استغلو الكابيتان يحيى جبران وصحابو وماركاو بيوت الرباح.