عموتة: كنستاهلو الرباح على ريفرز النيجيري والتأهل وهارسالتي للوداديين

أكد الحسين عموتة مدرب الوداد الرياضي أن الرباح اللي حققو الفريق الأحمر على ريفرز يونايتد النيجيري فدور 32 من دوري أبطال إفريقيا، واللي خلاه يتأهل لدور ليكروب من البطولة، كان مستحق وراه مهم بزاف للمجموعة، ووجه ميساج شكر للوداديين اللي شجعو الحمرا.
الحسين عموتة وضح فتصريح من بعد الفوز لكبير ديال الوداد بنتيجة 6 لزيرو على ريفرز يونايتد النيجيري وقال: "ماتش اليوم كان مهم عندنا، كان خاص يكون عندنا رد فعل من بعد الخسران فماتش الألي، واللي تلعب فظروف صعيبة وكانت فيه أخطاء تحكيمية تسببت فخسارتنا".
وأضاف مدرب الوداد: "اللعابا ديالنا دخلو فالماتش من الأول، وحتى الوقت اللي تماركاو فيه لبيوت ساعدنا، وحتى ضربة الجزاء اللي جا منها البيت الثاني والطرد ديال كول ريفرز سهلو علينا الخدمة".
عموتة أكد بلي الواك كيستحق الفوز وقال: "اليوم كانستاهلو الرباح حيث درنا مجهودات كبيرة، ووصلنا لمرمى الفريق النيجيري بزاف المرات، وكان ممكن تكون النتيجة كبيرة".
وختم الحسين عموتة كلامو برسالة للوداديين وقالهم: "حضور جماهير الوداد ديما كيكون مميز وكنشكرها حيث جات للتيران وكنتمنى نكونو ديما عند حسن ظنها".