واحد من أغلى الأفلام فتاريخ السينما الميريكانية فشل وضرب الحيط وشركة الإنتاج قررات ماتدوزوش – فيديوهات

شركة إنتاج ميريكانية قررات تسحب فيلم وخا كلفها عشرات الملايين من الدولارات، وهو نفسو اللي تعتابر من بين الأفلام الأكثر تكلفة فتاريخ السينما فميريكان، بعدما خدا نتائج سلبية بزاف فالتجارب الأولية اللي تدارت. خسارة مالية كبيرة.
و قالت شبكة "سكاي نيوز" البريطانية، نهار الأربعاء، بللي شركة "Warner Bros" قررات تحبس عملية التوجاد لعرض فيلم "بات كَيرل" (Batgirl)، اللي كيعاود على بطلة خارقة.
قرار صدم عدد كبير من الجمهور اللي كان كيتسنا هاد الفيلم.
وهاد القرار تحسم وخا أن تكلفة الفيلم الإنتاجية وصلات لحوالي 100 مليون دولار حسب بعض التقديرات، كواحد من أكثر الأفلام فتاريخ السينما الميريكانية اللي كلفو فلوس كثيرة. وتسحب الفيلم فمرحلة ما بعد الإنتاج.
وكان من المقرر أنه يتعرض الفيلم فبلاتفورم "HBO Max" من بعد الصيف هاد العام، فالوقت اللي قالت عدد من التقارير، اللي خرجات فشهر أبريل الفايت، بللي الشركة المنتجة باغيا تدوزو فقاعات السينما.
ولكن فاللخر تحسم بللي الفيلم ماغاديش يدوز لا فالسينمات ولا ف"HBO Max" من بعد النتائج الخايبة ديالو فالتجارب الأولية، اللي كتدار عادة قبل عرض الفيلم على الجمهور، وكيشاركو فيها عينة من الجمهور لاستطلاع الآراء ديالهم.