جوج مرات فشهر واحد.. القصر ديال الأمير هاري ومراتو ميكَان حاولو يبراكيوه

قالت تقارير صحفية بللي الدار ديال الأمير البريطاني هاري ومراتو المريكانية، ميكَان ماركل، تعرضات لمحاولة براكاج من طرف الشفارة 2 مرات فشهر ماي اللي فات.
جورنال "ذا صن" البريطاني قال بللي القصر ديال الكوبل ميكَان وهاري فكاليفورنيا تعرض لمحاولة اقتحام داروها الشفارة وفشلو، وعاودو المحاولة الثانية بعد 2 سيمانات.
وزاد نفس الجورنال بللي دابا تزاد عدد الحوادث الأمنية اللي عندها علاقة بدار هاري وميكَان ل6 دالحوادث، فظرف 14 لشهر اللخرة، وهادشي اللي خلا البوليس يتدخلو.
هاري وميكَان كيعيشو مع ولدهم فقصر الثمن ديالو واصل ل14 مليون دولار، فولاية كاليفورنيا الميريكانية.