عاجل. الديوانة حصلات كميات كبيرة ديال الحشيش كانت غادي تهرب من الكَركَرات لدول إفريقيا جنوب الصحرا – تصاور

تمكنات عناصر الجمارك اللي خدامة فالمعبر الحدودي الكَركَرات من إحباط عملية تهريب كميات كبيرة ديال الحشيش. هادشي كان فزوال اليوم السبت.
وحسب مصادر "كَود"، فإن هاد الحشيش كان مخبي مزيان فأومبالاج وسط صنادق عامرة بمواد استهلاكية موجهة للتصدير لإحدى الدول الإفريقية.
من جهتها، قال المديرية الجهوية ديال الديوانة فالجنوب بللي عناصرها اللي فالكَركَرات"، ومعاهم الجوندارم والبوليس، فعملية مراقبة روتينية بجهاز السكانير للكاميونات ديال السلعة اللي غادية لدول إفريقيا جنوب الصحرا، قدرات ترصد هاد الكمية من المخدرات و اللي كانت محملة بكاميو خاص بالنقل الدولي مرقم فالمغرب وجاي من مدينة أكَادير وغادي لدولة مالي.
دبا النيابة العامة أمرات بفتح بحث قضائي فهاد القضية.