ها الشركة اللي كتتعامل مع مافيا المازوط المهرب من ليبيا.. ديوانة الرباط دارت لونكيط والقضية فيها تهريب فلوس وجرائم أخرى

واحد القضية كتبات عليها جريدة "الصباح" السيمانة اللي فاتت، حول اختراق مافيا السوق السوداء للمحروقات المهربة من ليبيا، واللي ذكرات فيها بللي إدارة الديوانة ديال الرباط، هيا اللي دارت أونكيط، وفضحات الطريقة ديال تهريب المازوط من ليبيا، وبللي ما يمكنش المازوط يدوز في ليكونتونور إلا إذا كان "التواطؤ والتقصير من موظفي الميناء التجاري ديال كازا".
"كَود" جابت التفاصيل على الشركة اللي متورطة فهاد القضية، تتبيع المازوط ديال ليبيا، خصوصا أن الأبحاث ديال الديوانة، مازال موقفاتش، وخا تم حجز 500 طن ديال الكَازوال في ليكونتونور، داخلة على أساس أنها دوليو.
دايا هاد 500 طن فضحات آلاف الأطنان اللي كانت كتدخل للمغرب من طرف مافيا منظمة تسهر على شحنها من البحر الأبيض المتوسط بتواطؤ مع المهربين الليبيين والشركات ديال المحروقات تما، ويصوبو ليها الأوراق على أساس أنها كميات ديال الدوليو للتمويه.
دبا القضية مافيهاش غير المازوط بل هي مافيا، حيث خاصنا نعرفوا الطريقة باش تتخلص هاد الأطنان ديال المازوط المهرب، يعني بكل بساطة كاينة حتى ريحة تهريب الأموال.
هادشي كولو ماغاديش يفكو غير تدخل ديال الشرطة القضائية المختصة، باش يعرفوا الكميات تاع "الدوليو" اللي دخلات في هاد السنين الأخيرة، وفين مشات، حيت هي في الواقع مازوط مهرب، وراءه مافيا عابرة للحدود ومعاهم مغاربة بطبيعة الحال.