من جنوب إفريقيا لقطر.. 4 صحاب غاديين للمونديال بالبيكالات

قررو 4 دالصحاب يسافرو من "كيب تاون" فجنوب إفريقيا فاتجاه قطر على بيكالاتهم باش يحضرو لكاس العالم اللي غيكون فشهر 11 من 2022.
صحاب هاد المغامرة الزوينة هوما من مدينة "Cordoba" الأرجنتينية (Lucas Ledezma و Leandro Blanco Pighi و Silvio Gatti و Sebastian Rodriguez)، وغادي يدوزو على 15 دولة فجوج قارات، إفريقيا وآسيا، باش يحضرو ويشجعو منتخب بلادهم الأرجنتين فالماتش اللول ديالو ضد السعودية.
الرحلة غادي يقطعو فيها حوالي 10500 كيلومتر فمدة 6 شهور، بين "كيب تاون" و العاصمة القطرية "الدوحة"، على حسب ما صرح بيه واحد من المشاركين لوكالة "رويترز".
وماشي هادي المرة اللولة اللي غيديرو فيها هاد الدراري بحال هاد التجربة، حيت سبق ليهم مشاو بالبيكالات لأولمبياد البرازيل ف2018 وحضرو ل"كوبا أميريكا" ف2015، ومونديال البرازيل ف2014، زيادة على كاس العالم فروسيا عام 2018.