الڤاكسان الصيني ضد "كورونا" اللي وقفات تجاربو البرازيل ما عندو علاقة بالڤاكسان اللي غادي يدار فالمغرب. ديالنا ديال "سنوفارم" وها كيفاش وصل لعندنا

خبار خايب هاد الصباح فيه ان السلطات البرازيلية قررات توقف التجارب السريرية على لقاح صيني ضد "كورونا" فيروس". هاد اللقاح اسمو "كورونافاك" طورو مختبر "سينوفاك بايوتيك" الصيني. هاد القرار جا بعد تعرض متطور لحادث خطير ما قالوش.
هاد لخبار غادي يخلع بزاف لمغاربة. حنا فرحنا البارح بعد اجتماع دارو الملك وتعلن فيه عن الاستعدادات باش يديرو الڤاكسان فالمغرب قريبا. ابعد تقدير فاول دجنبر. اي قريب قريب. غادي يبداو لناس الصفوف الامامية فمواجهة هاد الجايحة: رجالات الصحة والسلطة وكافة رجالات القوات العمومية وحتى الجيش والبومبية.
غير هو باش تتحققو فلخبار غاديين ترتاحو. اييه هادا لقاح دارتو الصين ولكن ماشي هو الوحيد. الصين كطور فجوج. الاول بدات كتخدمو عندها والثاني هو اللي وقع فيه المشكل فالصين.
فالصين كاينة جوج شركات كيطورو الڤيروس: "سينوفاك بايوتك" و"سينوفارم". اللي وقع فيه المشكل فالبرازيل ديال سينوفاك واللي عندنا فالمغرب وبدا يتجرب فالصين ديال "سينوفارم"
صحاب الشركة "سينافارم" كانو قالو هادي اشهر باللي غادي يكون موجود فاخر العام وغادي يتطرح فالسوق فدجنبر وثمنو غادي يكون 140 دولار. غير هو مع الدول اللي خدمت معاها غادي يكون قبل. بحال اللي وقع معانا.
الرباط وبيكين كانو دارو اتفاقية بعد اتصال كان بين الملك محمد السادس والرئيس الصيني. وكالة الانباء الصينية كانت كتبات باللي بكين والرباط يتمتعان بصداقة عميقة مع تفاهم وثقة متبادلين، حيث دعم كل منهما الآخر في القضايا المتعلقة بالمصالح الجوهرية والاهتمامات الرئيسية.