"الجنس مقابل النقط".. دفاع المتهمين دار مرافعة خاصة هاجم فيها الاعلام والشهود والفرقة الوطنية

هاد الشي ديال شي محاميين ما غاديش يسالي بالمرة، كل نهار كنحضرو الجلسات كنقولو غيرتقي الدفاع الا انه في كل مرة كيكون انزلاق في شكل .
هاد المرة محامي كبير خرج على السطر بالمزيان ملي شد الكلمة او بدأ في مرافعة ،حيث هاجم فيها الاعلام والشهود والفرقة الوطنية، بحال ان هذوا طرف في الخصومة ، هاد الشي غير مسؤول ولكن النقيب الله يجازيه بكل خير محركش الساكن ومهضرش على هاد المهزلة لي وقعات اليوم بالقاعة 1 بالمحكمة الابتدائية بسطات.
هاد المحامي هاجم الصحافة وبغى يوريهم خذمتهم واستنكر تعاطيهم للملف ،علما ان عمل الصحافة هو نقل الاخبار وايصالها لابعد نقطة كاينة لتمكين المواطنين من حقهم في المعلومة ،من بعد دار للشهود بدا يسب فيهم، اتهم لول بأنه جا يشهد وهو متعاطي للمخدرات واتهمو بانه كيوصف احد المتهمين بتسمية "مجينينة" وهاد الشي رفضو الشاهد في اتصالو مع "گود" وقال انه معندو علم بهاد المصطلح لي قالو المحامي وبلي هو معندو تا مشكل مع اي محامي كيفما كان.
المحامي زاد ضحك على الشاهدة وصال لهبل ،وقال على انه خصنا نسميوها الهبيلة ماشي لهبل لانها بقات كتهبل علينا.
وفي خرجتو الاعلامية مباشرة ،بعد مرافعتو اتهم عناصر الفرقة الوطنية للشرطة القضائية بانهم ماداروش خدمتهم مزيان وبانهم ضغطو على مصرحات باش يقولو كلام وميقراوش المحضر.
الصراحة هاد الكلام خطير لي كيتقال من محامي كيقول على راسو محامي معروف لان هاد الشي في الحقيقة هو كلام غير مسؤول ومغيزيد الملف والو.
وفي الاخير نشير ان القضية قربات تسالي وكاينة جلسة جديدة نهار الإثنين 14 مارس جاي لي غادي اكمل فيها دفاع المتهمين مرافعاتهم قبل اصدار الحكم لي يقدر يكون في ذاك الاثنين ولا الاثنين لي وراه