سكوب.. بعد 6 أشهر من انتخابه: رئيس مجلس المستشارين ميارة كرا فيلا ب80 بألف درهم لمدة 6 أشهر وغايشريها ب28 مليون درهم.. ومقرب منو ل"گود": فعلا كراها من مالو الخاص

علمت "كود" من مصدر مطلع أن النعم ميارة، رئيس مجلس المستشارين، كيستعد يشري فيلا بحي بئر قاسم طريق زعير، بقيمة تناهز حوالي 2.8 مليار. حسب توقعات مصادر "گود".
وأوضحت مصادر "كود" أن ميارة كاري حاليا هاد الفيلا الجديدة، لي كتواجد بالقرب من كبار المسؤولين والمحظوظين من رجالات الدولة، بحيث قرر يكريها لمدة 6 اشهر وبعدها يفاليدي الشراء لي عند النوطير، اي بعدها غايشريها بشكل مباشر.
وحسب معلومات "كود" فإن ميارة كرا الفيلا عند ملايري معروف سميتو بلمجدوب كان مستثمر فالذهب.
مقرب من ميارة قال ل"گود" بأنه فعلا كرا الفيلا، و مبغاش يعطي تفاصيل حول الموضوع.
ميارة طبعا عندو فلوس ومن أعيان الصحراء وعندو عقارات كثيرة، شرا الفيلا باش يبقا قريب من المؤسسة البرلمانية، وباش ميبقاش يمشي ويجي يوميا من كازا للرباط.
يومية الأخبار سبق ليها كتبت بلي ميارة شرا سيارات من نوع رفيع لأعضاء مكتب مجلس المستشارين وعطا لرؤساء الفرق سيارات في ملكية المجلس، هادي سابقة من نوعها. حسب جريدة الأخبار، يلا كان هادشي صحيح فراه تسيير غريب لميزانية المجلس.