نهار 21 يناير، موقع "Medias 24" او بالاحرى "Le Boursier" التابع ليه، نشر حوار مع الميلياردير عثمان بنجلون، قال فيه ان بنك أفريقيا (البنك المغربي للتجارة الخارجية سابقا) كيستعد لتحول استراتيجي كبير، سيتم الإعلان عن تفاصيلو فمارس الجاي، ومن المتوقع يشمل هاد التحول كافة أنشطة البنك فإفريقيا فأفق عام 2030. وأضاف رئيس تجمع الأبناك وعميد المصرفيين الأفارقة فالتصريح ديالو، أن هاذ التحول الاستراتيجي الكبير، اللي مبغاش يتكلم على التفاصيل ديالو وبقى متكتم عليها، هو ثمرة تعاون وعمل استمر مدة عام كامل مع شركة الاستشارات الإدارية الأمريكية "ماكينزي". هنا غادي تبدا الاشاعات، وغتنوض روينة فعالم الفينونس الكازاوي وغادي يوصل الايكو ديالها حتى للوسط السياسي الرباطي. فعلا بدات اشاعة كتقول ان وزير الصناعة السابق مولاي حفيظ العلمي كيستعد باش يشري كخطوة اولى، جزء مهم من أسهم البنك المغربي للتجارة الخارجية "BMCE" ديال عثمان بنجلون. وقالو انه غادي يستحوذ على 25 بالمائة من أسهم المؤسسة البنكية المذكورة، وهي النسبة اللي كيملكها البنك الفرنسي "Crédit Mutuel". وماشي غير هادشي، العلمي، وحسب نفس الاشاعات، عندو مليار دولار ليكيد وغادي يطلع بيها فالكابيطال ديال "BMCE BANK"، وغادي يستحوذ حتى على لاسورانس "RMA AlWataniya". موقع "مغرب انتلجنس" كذب هادشي كامل، وقال ان مصادر من مجموعة "ساهام" اكدات لهم ان هاد الهضرة عبارة عن فايك نيوز وماعندها لاساس لاراس. واضاف "مغرب انتلجنس" انه بالفعل مجموعة "BMCE BANK" اللي كتشغل موقع مهم بزاف فالسيستيم البنكي المغربي هي اليوم مصدر عدة مخاوف. من غير كبر سن بنجلون، اللي فعمرو 92 عام، ومازال مابغى يتنازل على بلاصتو، الگروب "BMCE BANK"، غارق فالديون بسباب برج محمد السادس اللي غادي يتقام بكثر من 600 مليون دولار واستنزف المجموعة. وحتى بنتو وولدو مامهتمينش يعوضو باهم حيت كلها وفين خايد، كمال بنجلون، مهتم بالبيئة والطاقات المتجددة، وعندو شركة BDA Africa (Bio-cellular Design Aeronautics Africa) كانت صنعات اول درون مغربي ف2018.. ودنيا بنجلون منتجة سينمائية ماعندها علاقة بعالم الفينونس والفلوس. ويذكر ان مجموعة "FinanceCom فينونس كوم" وهولدينگ "Benjelloun Mezian بنجلون أمزيان" اندامجو، العام اللي فات، فمجموعة جديدة سماوها "O CAPITAL GROUP – أو كابيتال گروب" برئاسة عثمان بنجلون. https://www.maghreb-intelligence.com/fake-news-selon-des-sources-autorisees-a-saham-moulay-hafid-elalamy-ne-va-pas-racheter-bmce-bank/ http://leboursier.ma/un-grand-virage-strategique-se-prepare-a-bank-of-africa-othman-benjelloun.html
