حرب روسيا على أوكرانيا دخلات نهارها السابع.. إنزال عسكري كبير ف"خاركيف" والجيش الروسي سيطر على هاد البلايص

دخلات اليوم الأربعاء العملية العسكرية الروسية ضد أوكرانيا نهارها السابع. التصعيد العسكري متواصل وخا كاينة ضغوطات كبيرة من الغرب على موسكو، من خلال عقوبات اقتصادية موجعة، آخرها جاء من واشنطن.
ميريكان اليوم غادي تقرر إغلاق مجالها الجوي بالكامل أمام الطيران الروسي بسبب هاد الحرب اللي مزال مستمرة، وخا كانت هضرة باللي غادي تكون شي مفاوضات بين موسكو وكييف لكن لحدود الساعة القضية غادية وكتكفس.
الجيش الأوكراني أكد باللي قوات روسية دايرة إنزال فمدينة "خاركيف"، وبالضبط حدا قاعدة عسكرية وصبيطار فالمنطقة، فيما أفادت وزارة الدفاع الروسية بأن قواتها تسيطر بالكامل على المركز الإقليمي لمدينة "خيرسون" جنوب أوكرانيا.
وسائل إعلام من عين المكان كتقول باللي وقعات اشتباكات فمدينة "سومي" شمال شرقي أوكرانيا، كما أفادت منظمة الأمن والتعاون الأوروبي بسماع دوي انفجارات وإطلاق نار في كل من "خاركيف" و"خيرسون" و"دونيتسك".