سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
يوميات "كود" فياوندي. الفوت دين الكاميرونيين. نهار الماتش كلشي كيولي باعلام بلاد ما عندها لغة موحدة ولا دين واحد الا الكورة والبيرا وممثل الله فالكاميرون بيا حتى ملكة جمالهم محزمة مع الفوت
فسوق شعبي وسط مدينة ياوندي الكاميرونية منشورة صورة بين رئيس الكاميرون الابدي بول بيا ومراتو كتوسطهم البابا فرانسيس. فالصورة تكتب عليها « ممثل الله فالارض هو الباب. ممثل الله فالكاميرون هو الرئيس معاليه بول بيا. ممثلة مريم فالكاميرون هي السيدة شانطال بيا نيانكونو اسد الجنوب » فدولة فيها حوالي 260 اثنية وكل اثنية عندها لغة وفدولة ما عندها لغة موحدة، الفرنسية ظهرات مع الاستقلال وعولو عليها كعامل موحد واخا على مناطق فالدولة كتهدر بالانجليزية وهي سباب المشاكل دابا لهاد الدولة بالاضافة الى تيارات راديكالية اسلامية منها بوكو حرام. وسط هاد الشي كولو اش عندهم اللي يجمعهم؟ دولة فيها المسلمين والمسيحيين ووسط هاد الديانات كاينة تيارات. كاين بول بيا الرئيس. هادا ضابط امورو مزيان ولكن للي كيجمع هاد الوطن هو منتخب الاسود غير المروضة. الكورة. هاد الشي بان فماتش اليوم فافتتاح الكان باش لعبات مع بوركينا فاسو فملعب اومبلي بياوندي. من الساعات الاولى فالصباح كلشي لابس التوني ديال المنتخب. كلشي كيشطح ويغني. راه ما كاينش شي حي فهاد المدينة اللي دارت فيهم « كود » فالصباح وحتى بدا الماش اللي ما لابسش الدرابو. اللي عندو موطور مزوقو بالراية والوان لبلاد واللي عندو طونوبيلة معلق الراية واللي ما عندو والو هاز زمارتو وكيضرب. كاين اللي دار فرقة مع صحابو بالطبل والالات الموسيقية وخرج كيدور فالدروبا. كاين اللي لابس كسوة فيها الرئيس بحال وحدة تلاقيناها حدا التيران. باش سولاتها "كود" علاش لابساها ردات باللي تعبير على حبها لبيا. الربطة زغبية وبزاف ماشي كلشي مشى للتيران اللي دشن اول ماتش ليه. لقهاوي والبارات عامرين. دارو فضاءات للفراجة للمشجعين وصحاب الريسطورات والبارات دارو تلفازات كبيرة. فبلاد الكورة والبيرة هادي هي لوجيبة يضربو يديهم. جمهور الكاميرون ماشي عنيف كيف تقدر تصورو. هنا ناويين يديرو كاس افريقيا ومن حقهم راه دولة كبيرة فالكورة وسبق داوها شي 5 المرات. باش ماركات عليهم بوركينا فاسو البيت الاول فالشوط الاول ما تقلقوش بزاف بزاف. لكن باش تعادلو طارو من الفرحة وتزادت الفرحة بعد البيت الثاني. سالى الماتش ورجع الرئيس ديالهم وضيوفو لاقاماتهم ولكن الزنقة بقات كلها نشاط. موحالش ينعسو هاد الليلة. باقيين منوضينها فالزناقي دابا واخا ساعة وربع باش سالا الماتش. فمدخل "هيلطون" خرجات ملكة جمال الكاميرون. لابسة راية بلادها ومزوقة بداربو بلادها. قالت فتصريح ل"كود" باللي من مهامها دافع على بلادها. تسوق صورتو للخارج وتمنات تزور المغرب اللي ما عمرها حطات فيها رجلها. ملكة الجمال كيف قالت ل"كود" حتى هي كوايرية وكتلعب مهاجمة. ياك قلت ليكم راه الكورة هي دينهم الكورة من الوسائل اللي قادرة تخليهم ينساو همهم. حتى بوركينا فاسو استعملو خطاب قوي باش يحمسو اللعابة. مدربهم اللي كان اليوم فالتوش حقاش المدرب الاصلي فيه كوفيد٬ قال قبل الماتش باللي لبلاد مكرفصة وعاشت وكتعيش مشاكل مع الكوفيد مع الارهاب مع الوضعية الاقتصادية وزاد باللي اللي ممكن يفرح عشرين مليون بوركينابي هو المنتخب. حاولو ولكن خسرو فاللخر خسارتهم دخلات دولة كلها فهستيريا سعادة ونشاط وشطيح. واخا الكوفيد موحالش الكاف كانت معولة على بدية بحال هادي.
