الخفة خايبة عند لوزرا الصغار وكتوصل للفضايح. كيفاش الوزير البامي بنسعيد يسافر فطيارة خاصة والتجمعي بنموسى فنفس الفترة مشى فرحلة عادية لاكادير

البامي المهدي بنسعيد وزير الشباب والثقافة والتواصل شوية خفيف. يمكن بزاف خفيف. من حقو يدير خرجات ولكن كثرة الضو كيعمي بصيرة السياسي ايلى كانت ناقصاه خبرة.
كيتزريط. اخر فتوحاتو فهاد المجال هو انو خدا طيارة خاصة باش يتنقل لمراكش. حسب ما فسر بيه هاد الرحلة الغبية هو انو ماشي بالمال العام بل تكرم عليه شي صاحبو. هادي اخطر. باش كتكون مسؤول فالدولة ووزير ما خاصكش تقبل حتى غدا من عند صاحبك ما بالك بمستثمر كيخدم مع الدولة.
هاد التصرف كيبين قلة الخبرة والخفة ديال هاد لوزير. كان عليه يتعلم من زملاؤو فالحكومة. مثلا فنفس الفترة سافر وزير ماشي عادي لاكادير٬ وهو وزير التربية الوطنية والرياضة شكيب بنموسى٬ لمدينة اكادير. بنموسى مشى فرحلة عادية وبالليل مع المواطنين.
ما خداش طيارة خاصة وكان عندو مهام تماك ودار اجتماعات وشارك فانشطة عندها علاقة بالرياضة المدرسية الخاصة للمرأة ورجع فحالو فرحلة عادية.
دابا هاد بنسعيد علاش ما يتعلمش من بنموسى. علاش يدير فضيحة بحال هادي.