فاش كيتخلط التخلف والكلاخ والإجرام.. راجل باع مراتو ف الأنترنت باش يشري تلفون

باع شخص هندي، عندو 17 عام، مراتو (26 عام) لواحد آخر عندو 55 عام باش يشري تلفون!
وقالت الصحافة المحلية فالهند أن الواقعة طرات في ولاية راجستان (Rajasthan)، بعدما "باع الراجل مراتو"، اللي يلاه تزوجو 3 شهور هادي.
التحقيقات كشفات أن الفلوس خسرهم هاد المجرم غير في الماكلة وشرا تلفون جديد قالك باش يتكونيكطا!
هاد المريض، من بعد الجريمة ديالو، عيط لعائلة مراتو وقال ليهم أنها مشات عند عشيقها وشارجاهم كذوب، وهما حسو بأن القصة ماشي حتى لهيه وخبرو البوليس من بعد اللي فتحو لونكيط.
هاد الشخص دابا مشدود في الحبس باش يتربى، في حين ماتذكراتش أية تفاصيل على مصير السيدة وأيضا على المجرم الثاني اللي ساهم معه فهاد البشاعة بصفتو الشخص اللي "شرا المرا"!