الفرقة الوطنية بدات لونكيط مع بعيوي. مصدر قضائي ل"كود": حتى شي حد مكاين فوق القانون

علمت "كود" أن الفرقة الجهوية للشرطة القضائية بفاس بدات لونكيط ديالها بخصوص الشكاية اللي جاتها من الوكيل العام للملك لدى محكمة الاستئناف بالمدينة، وتتهم عبد النبي بعيوي رئيس الجهة الشرقية بتهم ثقيلة.
وقالت مصادر "كود" أن رئيس الجهة الشرقية غادي يتم الاستماع ليه فمحاضر قانونية. تعليمات الوكيل العام بفاس كانت واضحة. البحث مع بعيوي فهاد الشكاية وإحالة المسطرة على النيابة العامة باش تاخد المتعين.
مصدر قضائي أوضح أن القانون فوق الجميع وكيتطلق على كولشي ومكاينش هذا مسؤول وهذا ماشي مسؤول. وأكد المصدر ان القضاء حرك بزاف ديال القضايا وتابعو فيها مسؤولين كبار وفيهم اللي تحكم وكاين اللي مزال كيتحاكم وكاين اللي مزال في مرحلة التحقيق.
الشكاية اللي كانت حطاتها إحدى الهيئات المهتمة بحماية المال العام بالمغرب تبجدو فيها أسماء ديال عدد من الشركات اللي كانو استفادوا من صفقات عمومية كلفات فلوس صحيحة ومن سندات الطلب. البحث غادي يشمل كولشي وحتى شي موظفين بالمجلس الجهوي لجهة الشرقية.
"كود" كانت حاولات تعيط لرئيس الجهة الشرقية أكثر من مرة لمعرفة وجهة نظره فهاد الشكاية لكن التيليفون ديالو طافي ديما.